آڈیو لیک کیس، عدالت نے علی امین گنڈا پور کے وارنٹ گرفتاری جاری کردیئے

اسلام آباد کی ڈسٹرکٹ اینڈ سیشن کورٹ نے آڈیو لیک کیس میں عدم پیشی اور حاضری سے استثنٰی کی درخواست مسترد کرتے ہوئے علی امین گنڈا پور کے وارنٹ گرفتاری جاری کردیئے۔

وفاقی دارالحکومت اسلام آباد کی ڈسٹرکٹ اینڈ سیشن کورٹ نے سابق وزیر اعلیٰ خیبر پختونخوا اور پاکستان تحریک انصاف کے اہم رہنما علی امین گنڈا پور کے خلاف درج آڈیو لیک کیس کی سماعت کے دوران ان کے وارنٹ گرفتاری جاری کر دیئے ہیں۔

عدالت عالیہ نے متعلقہ پولیس حکام کو احکامات جاری کیے کہ علی امین گنڈا پور کو ہر حال میں گرفتار کر کے اگلی سماعت پر عدالت کے روبرو پیش کیا جائے۔

یہ بھی پڑھیں : وزیراعلیٰ خیبرپختونخوا کا وزیراعظم کو خط، سی این جی سیکٹر کو گیس کی فوری بحالی کا مطالبہ

کیس کی سماعت ایڈیشنل ڈسٹرکٹ اینڈ سیشن جج نصر من اللہ بلوچ نے کی، جہاں علی امین گنڈا پور کی جانب سے ان کے وکلاء نے عدالت میں حاضری سے مستقل یا عارضی استثنٰی کی باقاعدہ درخواست دائر کی تھی، تاہم فاضل جج نے دلائل سننے کے بعد ملزم کی حاضری سے استثنٰی کی اس درخواست کو یکسر مسترد کر دیا۔

عدالتی کارروائی کے دوران جج نے ریمارکس دیئے کہ علی امین گنڈا پور کی مسلسل عدم موجودگی اور عدالت میں عدم دستیابی کے باعث اس اہم کیس کے گواہان کے بیانات ریکارڈ کرنے کا عمل بری طرح متاثر ہو رہا ہے اور آج بھی گواہان کے بیانات قلمبند نہیں ہو سکے۔

اس صورتحال کو دیکھتے ہوئے عدالت نے اگلی پیشی پر استغاثہ کے تمام سرکاری گواہان کو دوبارہ طلب کر لیا ہے تاکہ ان کے بیانات کا عمل مکمل کیا جا سکے۔ بعد ازاں عدالت نے کیس کی مزید کارروائی اور سماعت کو آئندہ سترہ جون تک کے لیے ملتوی کر دیا۔