موٹروے ایم نائن پر ٹرالر پولیس وین پر چڑھ گیا، گڈاپ سٹی تھانے کے دو اہلکار شہید

موٹروے ایم نائن پر کاٹھور اور چکوال پمپ کے قریب ایک بے قابو ٹرالر روڈ کنارے کھڑی پولیس وین پر چڑھ گیا، جس کے نتیجے میں گڈاپ سٹی تھانے کے دو پولیس اہلکار موقع پر ہی شہید ہو گئے ہیں۔

سپر ہائی وے موٹروے ایم نائن پر کاٹھور اور چکوال پمپ کے قریب ایک انتہائی خوفناک اور دلخراش ٹریفک حادثہ پیش آیا ہے جس کے نتیجے میں ڈیوٹی پر مامور دو پولیس اہلکار موقع پر ہی شہید ہو گئے ہیں۔

موٹروے پولیس کے مطابق ایک تیز رفتار ٹرالر نوری آباد سے کراچی کی طرف جا رہا تھا کہ اچانک چکوال پمپ کے قریب بے قابو ہو کر سڑک کے کنارے کھڑی پولیس کی سرکاری وین پر چڑھ گیا۔

حادثہ اتنا شدید اور ہولناک تھا کہ پولیس وین ٹرالر کے نیچے دب کر مکمل طور پر تباہ ہو گئی اور اس میں موجود دونوں اہلکار گاڑی کے ملبے میں پھنس گئے۔

یہ بھی پڑھیں : ڈیرہ اسماعیل خان میں نامعلوم افراد کی فائرنگ سے ایک پولیس اہلکار شہید

حادثے کی اطلاع ملتے ہی ہنگامی بنیادوں پر بچاؤ کا کام شروع کر دیا گیا۔ ریسکیو اداروں نے فوری کارروائی کرتے ہوئے ایک پولیس اہلکار کی لاش کو ملبے سے نکال لیا تھا، جبکہ دوسرے اہلکار کی پھنسی ہوئی لاش کو نکالنے کے لیے کافی دیر تک امدادی آپریشن جاری رہا۔

جائے حادثہ پر تباہ ہونے والی پولیس وین اور ٹرالر کو راستے سے ہٹانے اور ٹریفک کی روانی بحال کرنے کے لیے ہیوی مشینری اور کرینوں کی مدد لی گئی، جس کے بعد گاڑیوں کو سڑک سے دور کیا گیا۔

موٹروے پولیس اور ریسکیو اہلکاروں نے دونوں شہید اہلکاروں کی میتوں کو ایمبولینس کے ذریعے فوری طور پر عباسی شہید اسپتال منتقل کیا۔

اسپتال ذرائع اور پولیس حکام کے مطابق حادثے میں شہید ہونے والے پہلے اہلکار کی شناخت پچاس سالہ صاحب خان ولد سلطان احمد خان کے نام سے ہوئی ہے جبکہ دوسرے شہید اہلکار کی شناخت بتیس سالہ ساجد علی ولد نبی بخش کے نام سے کی گئی ہے۔

یہ دونوں بدقسمت پولیس اہلکار گڈاپ سٹی تھانے میں تعینات تھے اور شاہراہ پر اپنی قانونی ڈیوٹی سرانجام دے رہے تھے۔

موٹروے پولیس اور مقامی انتظامیہ کی جانب سے اس سنگین واقعے کی مزید باریک بینی سے تحقیقات کی جا رہی ہیں اور ٹرالر ڈرائیور کے خلاف قانونی کارروائی کا آغاز کر دیا گیا ہے۔