بھمبر میں سابق چیئرمین زکوٰۃ و عشر چوہدری عدالت خان قتل

بھمبر (بارنالہ): ضلع بھمبر کے علاقے بارنالہ میں سابق چیئرمین زکوٰۃ و عشر اور سیاسی و سماجی شخصیت چوہدری عدالت خان کو نامعلوم مسلح افراد نے گولیاں مار کر قتل کر دیا۔

پولیس کے مطابق چوہدری عدالت خان بارنالہ کچہری سے واپس آ رہے تھے جب موئل پولیس اسٹیشن کی حدود میں پنگالی موڑ کے قریب نامعلوم مسلح افراد نے ان پر فائرنگ کی۔ متعدد گولیاں لگنے کے باعث وہ موقع پر ہی جاں بحق ہو گئے۔ واقعے کے دوران قریب سے گزرنے والی ایک خاتون بھی زخمی ہوئی جسے قریبی اسپتال منتقل کر دیا گیا۔

چوہدری عدالت خان پاکستان تحریک انصاف (پی ٹی آئی) کے حلقہ LA-5 بارنالہ کے چیف آرگنائزر بھی تھے۔

پولیس نے موقع پر پہنچ کر علاقہ کارڈن کر لیا اور ملزمان کی تلاش میں سرچ آپریشن شروع کر دیا۔ حکام نے بتایا کہ قتل کے محرکات کا تعین کرنے کے لیے تحقیقات جاری ہیں اور جائے وقوعہ سے مزید شواہد اکٹھے کیے جا رہے ہیں۔