سیاسی حلقوں میں بڑی ہلچل؛ پیپلز پارٹی اور مسلم لیگ ق کا اہم اعلان

گلگت بلتستان کے آئندہ انتخابات کے حوالے سے سیاسی سرگرمیاں تیز ہو گئی ہیں۔ اس سلسلے میں پاکستان پیپلز پارٹی (پی پی پی) اور مسلم لیگ ق نے باہمی سیاسی تعاون کا اعلان کر دیا ہے۔

مسلم لیگ ق کے ترجمان کے مطابق یہ فیصلہ پارٹی قائد چوہدری شجاعت حسین کی ہدایت پر کیا گیا ہے۔ اس تعاون کا مقصد سیاسی ہم آہنگی کو فروغ دینا اور ترقی و عوامی فلاح کے مشترکہ ایجنڈے کو آگے بڑھانا ہے۔

ترجمان کے مطابق دونوں جماعتیں اہم قومی اور علاقائی معاملات پر ایک ہی مؤقف رکھتی ہیں۔ اسی لیے گلگت بلتستان میں انتخابی عمل کے دوران بھی ایک دوسرے کے ساتھ تعاون کیا جائے گا تاکہ سیاسی استحکام کو یقینی بنایا جا سکے۔

دوسری جانب پیپلز پارٹی کے رہنما ہمایوں خان نے مسلم لیگ ق کے اس فیصلے کا خیرمقدم کرتے ہوئے کہا کہ اس سیاسی اشتراک سے گلگت بلتستان میں پیپلز پارٹی کی انتخابی پوزیشن مزید مضبوط ہوگی۔

انہوں نے کہا کہ دونوں جماعتوں کا یہ اتحاد خطے میں مثبت سیاسی ماحول پیدا کرے گا اور عوامی مسائل کے حل میں مددگار ثابت ہوگا۔