پاکستان آرمی دفاعی تعاون کے فروغ کے لیے پر عزم ہے، فیلڈ مارشل عاصم منیر

فیلڈ مارشل عاصم منیر کا کہنا ہے کہ پاکستان آرمی دفاعی تعاون کے فروغ کے لیے پر عزم ہے۔

پاک فوج کے شعبہ تعلقات عامہ ( آئی ایس پی آر ) کے مطابق لبنامی آرمی چیف کو جی ایچ کیو آمد پر گارڈ آف آنر پیش کیا گیا، فیلڈ مارشل عاصم منیر سے لبنانی آرمی چیف نے ملاقات کی جس میں خطے کی بدلتی صورتحال، دفاعی تعاون اور دوطرفہ فوجی تعلقات پر تبادلہ خیال کیا گیا۔

آئی ایس پی آر کے مطابق ملاقات میں دونوں ممالک کے درمیان دفاعی تعاون بڑھانے کے امکانات پر گفتگو ہوئی، افواج کے درمیان پیشہ ورانہ روابط مضبوط بنانے پر اتفاق ہوا، فیلڈ مارشل عاصم منیر نے لبنان سے دیرینہ دوستانہ تعلقات کی اہمیت اجاگر کی۔

دوران ملاقات فیلڈ مارشل عاصم منیر نے کہا کہ پاکستان آرمی دفاعی تعاون کے فروغ کے لیے پر عزم ہے۔ جنرل روڈولف ہائکل نے پاک افواج کی پیشہ ورانہ صلاحیتوں کو سراہا۔

   آئی ایس پی آر کے مطابق لبنانی آرمی چیف نے علاقائی امن و استحکام میں پاک افواج کے کردار کی تعریف کی، ملاقات میں تربیتی تعاون اور ادارہ جاتی روابط کے فروغ پر بھی گفتگو ہوئی، پاکستان اور لبنان کی افواج کے درمیان فوجی تعاون مزید مضبوط بنانے کے عزم کا اظہار کیا گیا۔

آئی ایس پی آر کا کہنا ہے کہ لبنانی آرمی چیف کا دورہ دونوں ممالک کے دفاعی تعلقات میں اہم پیش رفت قرار پایا، پاک لبنان فوجی قیادت نے دوطرفہ عسکری روابط بڑھانے پر زور دیا، دورہ پاکستان و لبنان کے درمیان دفاعی شراکت داری کے فروغ کی عکاسی کرتا ہے۔