پاک افغان بارڈر پر پاکستان کی کارروائیوں میں فتنہ الخوارج کے 26 دہشتگرد ہلاک ہوئے، عطا تارڑ

وفاقی وزیر اطلاعات عطا تارڑ کا کہنا ہے کہ پاک افغان بارڈر پر پاکستان کی کارروائیوں میں فتنہ الخوارج کے 26 دہشتگرد ہلاک ہوئے۔

وفاقی وزیر اطلاعات عطا تارڑ نے ایکس پر جاری اپنے بیان میں کہا کہ پاکستان نے پاک افغان سرحدی علاقوں میں دہشت گردوں کے ٹھکانوں پر مؤثر کارروائی کی، انٹیلی جنس اطلاعات کی بنیاد پر فتنہ الخوارج کے ٹھکانوں کو نشانہ بنایا گیا۔

انہوں نے کہا کہ کارروائی میں بھارت کے حمایت یافتہ 26 خارجی ہلاک ہوئے، فتنہ الخوارج کے 4 اہم مراکز مکمل طور پر تباہ کردیے گئے، تباہ کیے گئے اہداف میں تربیتی مرکز، اسلحہ ڈپو، خفیہ ٹھکانے شامل تھے۔

 عطا تارڑ کا کہنا ہے کہ کمانڈر علیم خوشالی اور اختر جانی خیل کے مراکز کو نشانہ بنایا گیا، موسیٰ درہ، شمالی وزیرستان، بنوں حملوں کے ذمے داروں کو نشانہ بنایا گیا۔

وفاقی وزیرا طلاعات نے کہا کہ پاکستان خطے میں امن و استحکام کے لیے پرعزم ہے، شہریوں کا تحفظ اور قومی سلامتی حکومت کی اولین ترجیح ہے، دہشت گردی کیخلاف کارروائیاں پوری قوت سے جاری رہیں گی۔