سرکاری ملازمین کی تنخواہوں میں اضافے سے متعلق ایک اور بڑی خوشخبری آگئی

قومی اسمبلی میں بجٹ تجاویز پر بحث کے دوران سرکاری ملازمین کی تنخواہوں اور پنشن میں اضافے کا معاملہ ایک بار پھر توجہ کا مرکز بن گیا۔

 پیپلز پارٹی نے حکومت سے مطالبہ کیا ہے کہ مجوزہ اضافہ موجودہ مہنگائی کے پیش نظر مزید بڑھایا جائے تاکہ ملازمین کو حقیقی ریلیف مل سکے۔

اجلاس کے دوران سابق اسپیکر قومی اسمبلی راجہ پرویز اشرف نے کہا کہ سرکاری ملازمین، پنشنرز اور کسان سب سے زیادہ مہنگائی کا بوجھ برداشت کر رہے ہیں۔ ہر نئے بجٹ کے بعد ان طبقات کے اخراجات میں اضافہ ہو جاتا ہے، جبکہ آمدنی اسی رفتار سے نہیں بڑھتی۔

انہوں نے کہا کہ کاروباری افراد اپنی مصنوعات کی قیمتوں میں اضافہ کر کے مہنگائی کا اثر کسی حد تک پورا کر لیتے ہیں، لیکن تنخواہ دار طبقے کے پاس ایسا کوئی اختیار نہیں ہوتا۔ اسی وجہ سے سرکاری ملازمین کو بڑھتی ہوئی مہنگائی میں شدید مالی مشکلات کا سامنا کرنا پڑتا ہے۔

راجہ پرویز اشرف نے کہا کہ حکومت نے بجٹ میں سرکاری ملازمین کی تنخواہوں میں 7 فیصد اضافے کی تجویز دی ہے، لیکن موجودہ معاشی حالات میں یہ اضافہ ناکافی محسوس ہوتا ہے۔ ماضی میں پیپلز پارٹی کی حکومت نے ملازمین اور پنشنرز کو زیادہ ریلیف دیا تھا، اس لیے اس بار بھی تنخواہوں اور پنشن میں کم از کم 10 فیصد اضافہ کیا جانا چاہیے۔