کشمیر، خیبرپختونخوا اور پنجاب کے بالائی علاقوں میں 7 جولائی سے موسلا دھار بارشیں متوقع

این ڈی ایم اے نے ملک کے شمالی حصوں میں 7 سے 10 جولائی تک شدید بارشوں، ندی نالوں میں طغیانی اور پہاڑی علاقوں میں لینڈ سلائیڈنگ کا ہائی الرٹ جاری کر دیا۔

نیشنل ڈیزاسٹر مینجمنٹ اتھارٹی (این ڈی ایم اے) نے ملک بھر کے لیے ایک اہم ترین الرٹ جاری کرتے ہوئے کہا ہے کہ 7 جولائی سے پاکستان کے شمالی علاقوں میں موسم کا ایک نیا اور فعال نظام داخل ہونے کا قوی امکان ہے۔

اس موسمی نظام کے اثرات کے تحت کشمیر، بالائی خیبرپختونخوا اور شمال مشرقی پنجاب کے مختلف حصوں میں گرج چمک کے ساتھ تیز بارشوں کی پیشگوئی کی گئی ہے۔

7 سے 10 جولائی کے دوران دریائے سندھ کے بالائی علاقوں، جبکہ دریائے جہلم، چناب، راوی اور ستلج کے بالائی حصوں میں بھی موسلا دھار بارشیں متوقع ہیں۔

یہ بھی پڑھیں : وزیراعظم اپنی کابینہ کے وزرا کو کنٹرول کریں، خواجہ آصف کو کشمیریوں سے معافی مانگنی چاہیے، بلاول بھٹو

این ڈی ایم اے کے مطابق 7 جولائی کو وفاقی دارالحکومت اسلام آباد، پوٹھوہار، آزاد کشمیر، گلگت بلتستان، خیبرپختونخوا، شمالی پنجاب اور شمالی بلوچستان میں ان بارشوں کی شدت میں غیر معمولی اضافہ ہو سکتا ہے۔

ادارے نے واضح کیا ہے کہ موجودہ صورتحال کے پیش نظر بڑے پیمانے پر کسی دریائی سیلاب کا کوئی خطرہ موجود نہیں ہے، تاہم بارشوں کے باعث پہاڑی ندی نالوں اور چھوٹے برساتی نالوں میں مقامی سطح پر اچانک پانی کے بہاؤ میں شدید اضافہ متوقع ہے۔

حساس بالائی علاقوں اور پہاڑی ندی نالوں میں مقامی سطح پر سیلابی صورتحال پیدا ہونے کا خدشہ ہے۔ اس کے ساتھ ہی، شدید بارش کے دوران شہری علاقوں میں سیلاب کا خطرہ بھی رہے گا، جس سے نشیبی علاقے زیر آب آ سکتے ہیں۔

این ڈی ایم اے نے بالخصوص خیبرپختونخوا، گلگت بلتستان اور آزاد کشمیر کے پہاڑی راستوں اور علاقوں میں لینڈ سلائیڈنگ کے شدید خطرے کا الرٹ جاری کرتے ہوئے مقامی انتظامیہ اور شہریوں کو احتیاطی تدابیر اختیار کرنے کی ہدایت کی ہے۔