ملک کے شمالی علاقوں میں کل سے بارشوں کا نیا سلسلہ، این ڈی ایم اے نے اہم الرٹ جاری کر دیا

قومی ڈیزاسٹر مینجمنٹ اتھارٹی (این ڈی ایم اے) نے خبردار کیا ہے کہ کل سے ملک کے شمالی علاقوں میں ایک نیا موسمی نظام داخل ہونے کا امکان ہے، جس کے باعث کئی علاقوں میں تیز بارشیں متوقع ہیں۔

 ادارے کے مطابق آزاد کشمیر، بالائی خیبرپختونخوا، شمال مشرقی پنجاب، اسلام آباد اور پوٹھوہار کے مختلف علاقوں میں گرج چمک کے ساتھ بارش ہونے کی پیشگوئی کی گئی ہے۔ بعض مقامات پر موسلادھار بارش بھی ہو سکتی ہے، جس کے باعث مقامی سطح پر مسائل پیدا ہونے کا خدشہ ظاہر کیا گیا ہے۔

این ڈی ایم اے کے مطابق یہ موسمی نظام دریائے سندھ کے بالائی علاقوں کو بھی متاثر کرے گا۔ اس دوران دریائے جہلم، چناب، راوی اور ستلج کے بالائی حصوں میں بھی بارش متوقع ہے۔ بارشوں کے نتیجے میں ان دریاؤں میں پانی کی آمد اور بہاؤ میں معمولی اضافہ ہو سکتا ہے، تاہم موجودہ صورتحال میں کسی بڑے دریائی سیلاب کا خطرہ نہیں بتایا گیا۔

ادارے کا کہنا ہے کہ تربیلا اور منگلا ڈیم میں بھی پانی کی آمد بڑھنے کا امکان موجود ہے۔ اگرچہ یہ اضافہ معمولی ہوگا، لیکن متعلقہ ادارے مسلسل صورتحال پر نظر رکھے ہوئے ہیں تاکہ کسی بھی ہنگامی صورت حال میں فوری اقدامات کیے جا سکیں۔

رپورٹ کے مطابق پہاڑی علاقوں میں بہنے والے ندی نالوں اور برساتی ریلوں میں پانی کی سطح اچانک بلند ہو سکتی ہے۔ اسی وجہ سے حساس مقامات پر مقامی سیلاب کا خطرہ موجود ہے۔ شہریوں کو ہدایت کی گئی ہے کہ بارش کے دوران غیر ضروری سفر سے گریز کریں اور ندی نالوں یا تیز بہاؤ والے مقامات کے قریب جانے سے احتیاط کریں۔

این ڈی ایم اے نے خبردار کیا ہے کہ مسلسل بارشوں کے باعث بعض شہری علاقوں اور نشیبی مقامات پر پانی جمع ہونے کا بھی امکان ہے۔ اس کے علاوہ خیبرپختونخوا، گلگت بلتستان اور آزاد کشمیر کے پہاڑی علاقوں میں لینڈ سلائیڈنگ کا خطرہ بھی بڑھ سکتا ہے، جس سے شاہراہوں کی بندش اور آمدورفت میں مشکلات پیش آ سکتی ہیں۔