بینظیر انکم سپورٹ پروگرام نے مستحق خواتین کیلئے اہم ہدایات جاری کردیں

بینظیر انکم سپورٹ پروگرام (بی آئی ایس پی) نے ملک بھر میں رجسٹرڈ مستحق خواتین کے لیے اہم ہدایات جاری کرتے ہوئے مالی امداد کی ادائیگی کے طریقہ کار میں بڑی تبدیلی سے آگاہ کیا ہے۔

 نئے نظام کے تحت خواتین کو سہولت، شفافیت اور محفوظ ادائیگی یقینی بنانے کے لیے ڈیجیٹل والٹ کا نظام متعارف کروایا جا رہا ہے۔ اس اقدام کا مقصد مستحق خواتین کو طویل قطاروں، کیش سینٹرز کے چکر اور غیر ضروری مشکلات سے بچانا ہے۔

بی آئی ایس پی حکام کے مطابق تمام رجسٹرڈ خواتین کو ہدایت کی گئی ہے کہ اگر انہیں ابھی تک پروگرام کی مخصوص سم (BISP SIM) موصول نہیں ہوئی تو جلد از جلد متعلقہ عمل مکمل کریں۔ سم حاصل کرنے کے بعد فوری رقم نکالنے کے بجائے کم از کم 10 سے 12 دن انتظار کرنا ضروری ہوگا تاکہ تمام ضروری ریکارڈ اور ڈیجیٹل نظام مکمل طور پر فعال ہو سکے۔

ادارے نے واضح کیا ہے کہ آئندہ مالی امداد براہِ راست ہر مستحق خاتون کے ذاتی ڈیجیٹل والٹ میں منتقل کی جائے گی۔ اس نئی سہولت کے بعد مخصوص اوقات میں دفاتر جانے یا ادائیگی مراکز پر لمبی قطاروں میں انتظار کرنے کی ضرورت نہیں رہے گی۔ مستحق خواتین اپنی سہولت کے مطابق مقررہ طریقہ کار کے ذریعے رقم حاصل کر سکیں گی۔

بی آئی ایس پی کے مطابق جیسے ہی امدادی رقم مستحق خاتون کے ڈیجیٹل والٹ میں منتقل ہوگی، اس کے رجسٹرڈ موبائل نمبر پر خودکار ایس ایم ایس بھیجا جائے گا۔ اس پیغام میں جمع ہونے والی رقم، رقم نکلوانے کی تفصیلات اور بینک کی جانب سے وصول کیے جانے والے چارجز کی مکمل معلومات درج ہوں گی، تاکہ ہر ادائیگی کا ریکارڈ شفاف انداز میں مستحق فرد تک پہنچ سکے۔

حکومت کی جانب سے اس وقت بی آئی ایس پی کی سہ ماہی قسط 14 ہزار 500 روپے مقرر کی گئی ہے۔ جبکہ ادائیگی کے عمل میں بینک کی پروسیسنگ فیس 280 روپے رکھی گئی ہے۔ تمام مالی لین دین محفوظ ڈیجیٹل نظام کے ذریعے انجام دیا جائے گا، جس سے شفافیت میں اضافہ ہوگا اور مستحق خواتین کو بروقت امداد کی فراہمی ممکن بنائی جا سکے گی۔