پہلا قومی شناختی کارڈ بنوانے والے نوجوانوں کے لیے اہم ہدایات

پاکستان میں 18 سال کی عمر کو پہنچنے والے نوجوانوں کے لیے قومی شناختی کارڈ بنوانا ایک اہم مرحلہ ہوتا ہے۔

 نیشنل ڈیٹابیس اینڈ رجسٹریشن اتھارٹی (نادرا) نے پہلی مرتبہ شناختی کارڈ حاصل کرنے والے شہریوں کی سہولت کے لیے ضروری معلومات اور رہنمائی فراہم کی ہے تاکہ درخواست کے عمل کے دوران غیر ضروری مشکلات اور تاخیر سے بچا جا سکے۔

نادرا ملک کے اندر اور بیرونِ ملک مقیم پاکستانیوں کو شناختی دستاویزات جاری کرنے والا واحد مجاز ادارہ ہے۔ ہر پاکستانی شہری کے لیے 18 سال کی عمر مکمل ہونے پر قومی شناختی کارڈ بنوانا ضروری ہوتا ہے، کیونکہ یہی دستاویز مختلف سرکاری اور نجی اداروں میں شناخت کے بنیادی ثبوت کے طور پر استعمال ہوتی ہے۔

نادرا کے مطابق پہلی بار شناختی کارڈ بنوانے والے نوجوان اکثر مکمل معلومات نہ ہونے کی وجہ سے مشکلات کا سامنا کرتے ہیں۔ بعض درخواست گزار ضروری دستاویزات کے بغیر رجسٹریشن سینٹر پہنچ جاتے ہیں، جبکہ کئی افراد کو یہ بھی معلوم نہیں ہوتا کہ کن حالات میں درخواست آن لائن جمع کروائی جا سکتی ہے اور کب نادرا رجسٹریشن سینٹر جانا لازمی ہوتا ہے۔

اسی مقصد کے لیے نادرا نے اپنے خصوصی پوڈکاسٹ میں پہلی بار شناختی کارڈ بنوانے کے پورے طریقہ کار کی وضاحت کی ہے۔ اس رہنمائی میں بتایا گیا ہے کہ کن افراد کے لیے پاک آئی ڈی (Pak ID) موبائل ایپ کے ذریعے درخواست دینا ممکن ہے اور کن صورتوں میں بائیومیٹرک تصدیق یا دیگر مراحل مکمل کرنے کے لیے نادرا سینٹر کا دورہ کرنا ضروری ہوگا۔

پوڈکاسٹ میں مطلوبہ دستاویزات، درخواست جمع کرواتے وقت کی جانے والی عام غلطیوں، آن لائن دستیاب شناختی خدمات اور پاک آئی ڈی موبائل ایپ کے مختلف فیچرز کے بارے میں بھی تفصیل سے آگاہ کیا گیا ہے۔ نادرا نے شہریوں کو مشورہ دیا ہے کہ درخواست جمع کروانے سے پہلے تمام ضروری معلومات حاصل کریں تاکہ شناختی کارڈ کے اجرا میں کسی قسم کی رکاوٹ پیش نہ آئے۔

ادارے نے اس بات پر بھی زور دیا ہے کہ شہری صرف نادرا کے سرکاری ذرائع سے ہی معلومات حاصل کریں اور سوشل میڈیا یا غیر مصدقہ ذرائع پر گردش کرنے والی معلومات پر انحصار نہ کریں۔ درست رہنمائی حاصل کرنے سے درخواست کا عمل زیادہ آسان اور تیز ہو سکتا ہے۔