پیسکو؛ دورانِ سروس جاں بحق ملازمین کے بچوں کیلئے کوٹہ کیسز دوبارہ کھولنے کا فیصلہ

پشاور الیکٹرک سپلائی کمپنی (پیسکو) نے دورانِ ملازمت انتقال کر جانے والے اور لائن ڈیوٹی کے دوران حادثات میں جاں بحق ہونے والے ملازمین کے اہل خانہ کے لیے اہم پیش رفت کرتے ہوئے زیرِ التوا کوٹہ کیسز پر دوبارہ غور کرنے کا فیصلہ کر لیا ہے۔

 اس حوالے سے کمپنی کی جانب سے باقاعدہ نوٹیفکیشن بھی جاری کر دیا گیا ہے، جس میں تمام متعلقہ دفاتر کو ضروری ہدایات جاری کی گئی ہیں۔ یہ فیصلہ ان خاندانوں کو ریلیف فراہم کرنے کے لیے کیا گیا ہے، جن کے کوٹہ کیسز مختلف وجوہات کی بنا پر طویل عرصے سے زیرِ التوا تھے۔

نوٹیفکیشن میں واضح کیا گیا ہے کہ 18 اکتوبر 2024 کو سپریم کورٹ کے فیصلے سے پہلے کے تمام زیرِ التوا کوٹہ کیسز اس عمل میں شامل کیے جائیں گے۔ پیسکو انتظامیہ ان کیسز کا جائزہ وفاقی آئینی عدالت کی وضاحت اور متعلقہ قانونی ہدایات کی روشنی میں لے گی، تاکہ ہر درخواست کو مقررہ قواعد کے مطابق نمٹایا جا سکے۔

کمپنی کا کہنا ہے کہ ابتدائی جانچ پڑتال مکمل ہونے کے بعد اہل امیدواروں کے انٹرویوز کے لیے باقاعدہ شیڈول تیار کیا جائے گا۔ اس مقصد کے لیے تمام درخواستوں، ریکارڈ اور متعلقہ دستاویزات کی تفصیلی جانچ کی جائے گی تاکہ شفافیت کو یقینی بنایا جا سکے۔

پیسکو ہیڈ آفس نے تمام فیلڈ دفاتر کو ہدایت جاری کی ہے کہ وہ اپنے علاقوں میں موجود تمام زیرِ التوا کوٹہ کیسز کی مکمل تفصیلات، ریکارڈ اور ضروری دستاویزات فوری طور پر مرتب کر کے ہیڈ آفس ارسال کریں۔ انتظامیہ نے اس عمل کو ترجیحی بنیادوں پر مکمل کرنے کی ہدایت دی ہے تاکہ جائزہ لینے کا مرحلہ بروقت شروع کیا جا سکے۔

نوٹیفکیشن کے مطابق تمام مطلوبہ معلومات اور دستاویزات 30 جولائی تک خصوصی میسنجر کے ذریعے پیسکو ہیڈ آفس پہنچانا لازمی ہوں گی۔ مقررہ تاریخ کے بعد موصول ہونے والے نئے کیسز یا دعوؤں پر غور نہیں کیا جائے گا، اس لیے تمام دفاتر کو وقت کی پابندی یقینی بنانے کی ہدایت کی گئی ہے۔