نادرا نے بچوں کے جووینائل کارڈ کے اجرا کا مکمل طریقہ کار بتادیا

نیشنل ڈیٹا بیس اینڈ رجسٹریشن اتھارٹی (نادرا) نے 18 سال سے کم عمر بچوں کے لیے جووینائل کارڈ (Juvenile Card) کے حصول کا نیا طریقہ کار، فیس اور کارڈ کی فراہمی کے اوقات سے متعلق تفصیلات جاری کر دی ہیں۔

نادرا کے مطابق جووینائل کارڈ حاصل کرنے کے لیے سب سے پہلے بچے کی رجسٹریشن مکمل ہونا ضروری ہے۔ اگر بچے کا اندراج پہلے سے موجود نہیں تو والدین یا قانونی سرپرست کو پہلے اس کی رجسٹریشن کروانی ہوگی۔ رجسٹریشن کے بعد درخواست گزار نادرا رجسٹریشن سینٹر سے ٹوکن حاصل کرے گا، جس کے بعد باقاعدہ درخواست کا عمل شروع ہوگا۔

درخواست کے دوران بچے کی تازہ تصویر لی جائے گی اور جہاں ممکن ہو وہاں بائیومیٹرک معلومات بھی حاصل کی جائیں گی۔ اس کے ساتھ والد، والدہ یا قانونی سرپرست کی بائیومیٹرک تصدیق بھی لازمی قرار دی گئی ہے تاکہ درخواست کی درستگی اور شناخت کی تصدیق یقینی بنائی جا سکے۔

 نادرا کا کہنا ہے کہ تمام معلومات کمپیوٹرائزڈ نظام میں درج ہونے کے بعد اپروول آفیسر درخواست کا مکمل جائزہ لے گا اور تصدیق کے بعد کارڈ جاری کرنے کا عمل شروع کیا جائے گا۔

اتھارٹی نے شہریوں کی سہولت کے لیے جووینائل کارڈ کی تین مختلف سروسز متعارف کروائی ہیں۔ نارمل سروس کے تحت 750 روپے فیس وصول کی جائے گی اور کارڈ تقریباً 31 دن میں فراہم کیا جائے گا۔ اگر درخواست گزار جلد کارڈ حاصل کرنا چاہے تو ارجنٹ سروس دستیاب ہے، جس کی فیس 1500 روپے مقرر کی گئی ہے اور اس کے تحت کارڈ تقریباً 23 دن میں جاری ہوگا۔

 اسی طرح فوری ضرورت کے لیے ایگزیکٹو سروس بھی موجود ہے، جس کی فیس 2500 روپے ہے اور اس کے ذریعے صرف 9 دن میں جووینائل کارڈ حاصل کیا جا سکتا ہے۔

نادرا نے واضح کیا ہے کہ درخواست صرف بچے کے والد، والدہ یا قانونی سرپرست ہی جمع کروا سکتے ہیں۔ درخواست کے ساتھ والدین یا سرپرست کے فنگر پرنٹس، فعال موبائل نمبر، ای میل ایڈریس اور بچے کے کمپیوٹرائزڈ پیدائشی سرٹیفکیٹ کی تفصیلات فراہم کرنا لازمی ہوگا۔ مکمل اور درست معلومات فراہم کرنے سے درخواست کی منظوری میں آسانی ہوگی اور غیر ضروری تاخیر سے بھی بچا جا سکے گا۔

نادرا نے والدین کو مشورہ دیا ہے کہ درخواست جمع کرانے سے پہلے تمام ضروری دستاویزات تیار رکھیں تاکہ عمل تیزی سے مکمل ہو سکے۔ ادارے کے مطابق اگر کسی شہری کو درخواست کے طریقہ کار، مطلوبہ دستاویزات یا فیس سے متعلق مزید رہنمائی درکار ہو تو وہ نادرا کی ہیلپ لائن 1777 یا سرکاری ویب سائٹ سے مستند معلومات حاصل کر سکتا ہے۔