بینظیر انکم سپورٹ پروگرام کی مستحق خواتین کیلئے اہم ہدایت جاری

بینظیر انکم سپورٹ پروگرام (بی آئی ایس پی) نے مستحق خواتین کے لیے ایک اہم پیغام جاری کرتے ہوئے ادائیگی کے نئے طریقہ کار سے متعلق ضروری معلومات فراہم کر دی ہیں۔

 پروگرام انتظامیہ کے مطابق اب سہ ماہی مالی امداد کی رقم مستحق خواتین کے ڈیجیٹل والٹ میں منتقل کی جائے گی، جس کے بعد متعلقہ بینک کی جانب سے رجسٹرڈ موبائل نمبر پر تصدیقی ایس ایم ایس بھیجا جائے گا۔ اس پیغام کے ذریعے خواتین کو فوری طور پر معلوم ہو جائے گا کہ ان کی امدادی رقم اکاؤنٹ میں منتقل ہو چکی ہے۔

بی آئی ایس پی حکام کا کہنا ہے کہ رقم کی منتقلی کے بعد جب مستحق خاتون اپنی امدادی رقم وصول کرے گی تو اسے ایک اور ایس ایم ایس موصول ہوگا۔ اس پیغام میں نکلوائی گئی رقم کی مکمل تفصیل درج ہوگی، تاکہ ہر خاتون آسانی سے یہ جان سکے کہ اس کے اکاؤنٹ میں کتنی رقم جمع ہوئی اور اس نے کتنی رقم وصول کی ہے۔ اس طریقہ کار سے ادائیگیوں میں شفافیت آئے گی اور مستحق خواتین کو اپنی رقم کی مکمل معلومات حاصل رہیں گی۔

حکام کے مطابق اس نئے نظام کا مقصد مستحقین کو مالی لین دین میں زیادہ سہولت فراہم کرنا اور غیر قانونی کٹوتیوں کی روک تھام کرنا ہے۔ ماضی میں بعض علاقوں سے شکایات سامنے آتی رہی ہیں کہ کچھ ریٹیلرز امدادی رقم کی ادائیگی کے دوران غیر قانونی کٹوتی کرتے تھے، جس سے مستحق خواتین کو مشکلات کا سامنا کرنا پڑتا تھا۔

بی آئی ایس پی نے واضح کیا ہے کہ اگر کسی ریٹیلر کی جانب سے مکمل رقم ادا نہ کی جائے یا غیر قانونی کٹوتی کی جائے تو مستحق خواتین اپنے موصول ہونے والے ایس ایم ایس کی بنیاد پر پوری رقم کا مطالبہ کر سکتی ہیں۔ اس صورت میں خواتین کے پاس رقم کی منتقلی اور ادائیگی کا واضح ریکارڈ موجود ہوگا، جس سے شکایت درج کروانے اور اپنے حقوق کے تحفظ میں آسانی ہوگی۔

پروگرام انتظامیہ نے تمام مستحق خواتین کو ہدایت کی ہے کہ وہ صرف اپنے رجسٹرڈ موبائل نمبر پر آنے والے سرکاری ایس ایم ایس پر اعتماد کریں اور کسی بھی غیر مصدقہ اطلاع یا افواہ پر یقین نہ کریں۔ اس کے ساتھ یہ بھی کہا گیا ہے کہ اپنے موبائل نمبر کو فعال رکھیں تاکہ ادائیگی سے متعلق ہر اطلاع بروقت موصول ہو سکے۔