پاکستان کا سفارتی کردار مزید مضبوط، نئے سفیر نے ایرانی وزیر خارجہ عباس عراقچی کو اسناد پیش کر دیں

پاکستان کے نئے تعینات ہونے والے سفیر عمران احمد صدیقی نے تہران میں ایرانی وزیر خارجہ عباس عراقچی کو اپنی سفارتی اسناد پیش کر دیں، جسے دونوں ممالک نے دیرینہ برادرانہ تعلقات اور علاقائی تعاون کے فروغ کی جانب اہم پیش رفت قرار دیا ہے۔

ایران اور امریکا کے درمیان جاری کشیدگی کے دوران پاکستان نے سفارتی رابطوں اور مذاکرات کے فروغ پر زور دیا ہے۔ نئی تعیناتی کے ذریعے اسلام آباد نے واضح پیغام دیا ہے کہ وہ ایران کے ساتھ اپنے تعلقات کو اہمیت دیتا ہے اور خطے میں امن و استحکام کے لیے سفارتی راستہ اختیار کرنے کا خواہاں ہے۔

پاکستان نے حالیہ علاقائی صورتحال میں کشیدگی کم کرنے، تمام فریقین کو مذاکرات کی طرف واپس لانے اور تنازعات کے پرامن حل پر زور دیا ہے۔ اسلام آباد کی جانب سے ایرانی، سعودی اور قطری قیادت سے رابطوں کو بھی علاقائی امن کے لیے سفارتی کوششوں کا حصہ قرار دیا جا رہا ہے۔

ایرانی حکام کے مطابق پاکستان جیسے ہمسایہ اور مسلم اکثریتی ملک کے ساتھ اعلیٰ سطحی سفارتی روابط اس بات کا اظہار ہیں کہ ایران خطے میں تنہا نہیں ہے اور علاقائی ممالک کے ساتھ تعاون جاری رکھے ہوئے ہے۔

ملاقات کے دوران دونوں رہنماؤں نے دوطرفہ تعلقات، تجارتی تعاون، سرحدی سلامتی، توانائی کے شعبے اور علاقائی امور پر تبادلہ خیال کیا۔

پاکستان نے ماضی میں بھی خطے میں امن، استحکام اور آزاد تجارتی راستوں کی اہمیت پر زور دیا ہے، جبکہ آبنائے ہرمز سمیت اہم بحری راستوں میں معمول کی سرگرمیوں کے تسلسل کو عالمی معیشت کے لیے ضروری قرار دیا ہے۔

سفیر عمران احمد صدیقی اور ایرانی وزیر خارجہ عباس عراقچی کے درمیان ملاقات ایسے وقت میں ہوئی ہے جب مشرقِ وسطیٰ میں بڑھتی کشیدگی کے باعث علاقائی سفارت کاری کی اہمیت مزید بڑھ گئی ہے۔