نادرا نے شہریوں کیلئے سیلف سروس کیاسک کی سہولت متعارف کروادی

نیشنل ڈیٹا بیس اینڈ رجسٹریشن اتھارٹی (نادرا) نے شہریوں کے لیے ایک اہم سہولت متعارف کروادی ہے۔

 اب شہری بعض شناختی دستاویزات سے متعلق کام خود سیلف سروس کیاسک کے ذریعے مکمل کرنے کی درخواست جمع کروا سکیں گے۔ اس اقدام کا مقصد نادرا سینٹرز میں شہریوں کے لیے سہولت پیدا کرنا اور مختلف خدمات کے حصول کے عمل کو مزید آسان بنانا ہے۔

نادرا کی جانب سے فراہم کی جانے والی سیلف سروس کیاسک سہولت کے ذریعے شہری شناختی کارڈ اور نائکوپ کی تجدید کے لیے درخواست دے سکتے ہیں۔ اس کے علاوہ گم یا خراب ہونے والے شناختی کارڈ کا متبادل حاصل کرنے کی درخواست بھی جمع کروائی جا سکتی ہے۔ خاندان کے کسی فوت شدہ فرد کا شناختی کارڈ منسوخ کروانے کے لیے بھی شہری اس سہولت سے فائدہ اٹھا سکتے ہیں۔

اس نئی سہولت کے تحت شہریوں کو ہر کام کے لیے روایتی طریقہ کار پر انحصار نہیں کرنا پڑے گا۔ کیاسک کے ذریعے درخواست جمع کروانے کا عمل شہریوں کے لیے وقت کی بچت کا باعث بن سکتا ہے۔ اس سے نادرا مراکز پر رش کم کرنے میں بھی مدد ملنے کی امید ہے۔

نادرا کے مطابق سیلف سروس کیاسک ملک کے مختلف شہروں میں قائم منتخب مراکز پر دستیاب ہے۔ کراچی میں یہ سہولت نادرا میگا سینٹر ڈی ایچ اے، نادرا میگا سینٹر نارتھ ناظم آباد اور نادرا میگا سینٹر سیمنس چورنگی میں فراہم کی جا رہی ہے۔

اسلام آباد میں شہری نادرا میگا سینٹر بلیو ایریا اور نادرا رجسٹریشن سینٹر بھارہ کہو سے اس سہولت سے فائدہ اٹھا سکتے ہیں۔ راولپنڈی میں نادرا میگا سینٹر مری روڈ، نادرا سینٹر سی ایس ڈی اور نادرا سینٹر واہ کینٹ میں سیلف سروس کیاسک موجود ہیں۔

لاہور میں یہ سہولت نادرا میگا سینٹر داتا گنج بخش، نادرا میگا سینٹر ایجرٹن روڈ اور نادرا میگا سینٹر پیکو روڈ پر دستیاب ہے۔ پنجاب کے دیگر شہروں میں بھی شہریوں کے لیے یہ سہولت فراہم کی گئی ہے۔ ان میں گوجرانوالہ، سیالکوٹ، فیصل آباد، جھنگ، سرگودھا، ملتان، بہاولپور اور رحیم یار خان کے منتخب نادرا مراکز شامل ہیں۔

سندھ میں حیدرآباد کے نادرا بگ سینٹر حیدرآباد اور نادرا بگ سینٹر ایسٹ میں سیلف سروس کیاسک کی سہولت موجود ہے۔ سکھر میں نادرا سینٹر سکھر سٹی سے شہری اس سہولت سے فائدہ اٹھا سکتے ہیں۔

بلوچستان میں کوئٹہ اور کوئٹہ کینٹ کے نادرا مراکز پر بھی سیلف سروس کیاسک دستیاب ہے۔ خیبرپختونخوا میں پشاور کے نادرا میگا سینٹر رنگ روڈ پر شہری اس سہولت کو استعمال کر سکتے ہیں۔

نادرا کی جانب سے سیلف سروس کیاسک متعارف کروانے کا مقصد شہریوں کو شناختی دستاویزات سے متعلق خدمات تک آسان رسائی فراہم کرنا ہے۔ اس سہولت سے خاص طور پر ان افراد کو فائدہ ہو سکتا ہے جو شناختی کارڈ کی تجدید، گم یا خراب کارڈ کے متبادل اور دیگر متعلقہ درخواستوں کے لیے نادرا مراکز کا رخ کرتے ہیں۔