لاہور میٹرو بس سروس بند ہونے کا خطرہ ٹل گیا، سروس بحال رکھنے پر اتفاق

لاہور: لاہور میں میٹرو بس سروس بند ہونے کا خطرہ وقتی طور پر ٹل گیا ہے، آپریٹر کمپنی ویڈا اور پنجاب ماس ٹرانزٹ اتھارٹی کے درمیان سروس جاری رکھنے پر اتفاق ہوگیا۔

جنرل منیجر آپریشنز ماس ٹرانزٹ اتھارٹی عزیر شاہ کے مطابق ویڈا کی جانب سے پیش کیے گئے مالی اور دیگر مطالبات پر سنجیدگی سے غور کیا جا رہا ہے، جبکہ معاملات کو باہمی رضامندی سے حل کرنے کے لیے مذاکرات جاری ہیں۔

عزیر شاہ نے واضح کیا کہ لاہور میٹرو بس سروس بدستور بحال رہے گی اور مسافروں کو سروس کی بندش کا سامنا نہیں کرنا پڑے گا۔

ان کے مطابق ویڈا کے مالی مطالبات سمیت دیگر معاملات پر دونوں فریقوں کے درمیان بات چیت جاری ہے۔ پنجاب ماس ٹرانزٹ اتھارٹی اور ویڈا کے نمائندوں کے درمیان آج دوبارہ مذاکرات ہوں گے، جن میں کمپنی کے مطالبات کے حل کے حوالے سے مزید پیش رفت متوقع ہے۔

روزانہ ہزاروں مسافروں کے لیے اہم سہولت

لاہور میٹرو بس سروس شہر کے اہم علاقوں کو ماس ٹرانزٹ نظام کے ذریعے جوڑتی ہے اور روزانہ بڑی تعداد میں شہری اس سہولت سے استفادہ کرتے ہیں۔ ایسے میں سروس کی ممکنہ بندش سے شہریوں کو آمدورفت میں مشکلات کا سامنا کرنا پڑ سکتا تھا۔

حکام کے مطابق فی الحال سروس معمول کے مطابق جاری رکھنے کا فیصلہ کیا گیا ہے، جبکہ آپریٹر کمپنی کے مطالبات کو مذاکرات کے ذریعے حل کرنے کی کوشش کی جارہی ہے۔