پاکستان کے ساتھ تعلقات مزید مضبوط کرنے کیلئے تیار ہیں، پاک ایران روابط سے علاقائی استحکام بڑھے گا؛ ایرانی صدر

تہران: ایرانی صدر مسعود پزشکیان نے کہا ہے کہ ایران پاکستان کے ساتھ سیاسی، اقتصادی، تجارتی، ثقافتی اور سکیورٹی سمیت تمام شعبوں میں تعاون مزید بڑھانے کے لیے تیار ہے، جبکہ دونوں ممالک کے مضبوط تعلقات خطے میں سکیورٹی اور استحکام کے فروغ میں اہم کردار ادا کرسکتے ہیں۔

ایرانی میڈیا کے مطابق پاکستان کے وفاقی وزیر داخلہ محسن نقوی نے تہران میں ایرانی صدر مسعود پزشکیان سے ملاقات کی، جس میں دوطرفہ تعلقات اور خطے کی مجموعی صورتحال پر تبادلہ خیال کیا گیا۔

ملاقات کے بعد گفتگو کرتے ہوئے صدر پزشکیان نے کہا کہ ایران پاکستان کے ساتھ مشترکہ تعاون کی راہ ہموار کرنے کے لیے تیار ہے۔

ان کے مطابق دوطرفہ تعلقات کو وسعت دینے سے دونوں ممالک کے باہمی مفادات کو تقویت ملے گی اور علاقائی سکیورٹی و استحکام مزید مضبوط ہوگا۔

ایرانی صدر نے کہا کہ تہران اسلام آباد کے ساتھ مختلف شعبوں میں تعلقات گہرے کرنے میں دلچسپی رکھتا ہے۔

ان کے مطابق سیاسی اور اقتصادی روابط کے ساتھ تجارت، ثقافت اور سکیورٹی کے شعبوں میں تعاون کو بھی مزید وسعت دی جاسکتی ہے۔

مسعود پزشکیان نے وزیراعظم شہباز شریف اور دیگر پاکستانی حکام کی جانب سے ایران کے ساتھ تعلقات مضبوط بنانے میں ظاہر کی جانے والی دلچسپی کو سراہتے ہوئے کہا کہ تہران تمام شعبوں میں پاکستان کے ساتھ تعاون بڑھانے کے لیے سنجیدہ ہے۔

انہوں نے کہا کہ ایران اور پاکستان کے درمیان مضبوط روابط نہ صرف دونوں ممالک کے لیے فائدہ مند ثابت ہوں گے بلکہ خطے میں امن، سکیورٹی اور استحکام کے لیے بھی مثبت کردار ادا کرسکتے ہیں۔

اس موقع پر وفاقی وزیر داخلہ محسن نقوی نے کہا کہ پاکستان اور ایران کے تعلقات مضبوط اور دیرینہ ہیں اور دونوں ممالک کے درمیان یہ روابط کسی صورت کمزور نہیں ہونے چاہئیں۔

محسن نقوی کے مطابق اسلام آباد ایران کے ساتھ تعلقات کو جامع بنیادوں پر مزید وسعت دینے کے لیے سنجیدہ اقدامات کررہا ہے۔

انہوں نے دوطرفہ تعاون کو مختلف شعبوں تک بڑھانے کی اہمیت پر بھی زور دیا۔

ایرانی میڈیا کے مطابق محسن نقوی نے ایرانی وزیر خارجہ عباس عراقچی اور اپنے ایرانی ہم منصب محسن مومنی سے بھی ملاقاتیں کیں، جن میں دوطرفہ تعلقات کے علاوہ خطے کی مجموعی صورتحال اور باہمی دلچسپی کے امور پر تبادلہ خیال کیا گیا۔

پاکستان اور ایران کے درمیان حالیہ عرصے میں اعلیٰ سطح کے رابطوں میں اضافہ ہوا ہے، جبکہ دونوں ممالک سرحدی سکیورٹی، تجارت، توانائی اور علاقائی امن سمیت مختلف معاملات پر تعاون بڑھانے کی خواہش کا اظہار کرتے رہے ہیں۔