اسلام آباد میں موسلادھار بارش، ٹریفک پولیس کی شہریوں کو احتیاط کی ہدایت

اسلام آباد میں موسلادھار بارش کے باعث اسلام آباد ٹریفک پولیس نے شہریوں کے لیے ٹریفک ایڈوائزری جاری کرتے ہوئے دورانِ سفر احتیاطی تدابیر اختیار کرنے کی ہدایت کی ہے۔

ٹریفک پولیس کے مطابق بارش کے دوران گاڑیوں اور موٹرسائیکلوں کی رفتار کم رکھی جائے اور آگے چلنے والی گاڑیوں سے مناسب فاصلہ برقرار رکھا جائے۔ شہریوں کو اپنی لین میں رہنے اور دورانِ بارش فوگ لائٹس کے استعمال کی بھی ہدایت کی گئی ہے۔

ٹریفک ایڈوائزری میں کہا گیا ہے کہ ڈرائیونگ کے دوران سائیڈ شیشوں اور انڈیکیٹرز کا درست استعمال کیا جائے جبکہ گاڑی میں سیٹ بیلٹ باندھنا لازمی قرار دیا گیا ہے۔

موٹرسائیکل سواروں کو ہدایت کی گئی ہے کہ وہ انتہائی بائیں لین میں سفر کریں اور ہیلمٹ کا لازمی استعمال کریں۔

اسلام آباد ٹریفک پولیس کے افسران شہریوں کی سہولت اور رہنمائی کے لیے مختلف شاہراہوں پر موجود ہیں۔ پولیس نے شہریوں سے اپیل کی ہے کہ بارش کے دوران احتیاط سے ڈرائیونگ کریں اور ٹریفک قوانین پر عمل درآمد یقینی بنائیں۔