وزیراعظم اپنا گھر پروگرام میں 40 لاکھ قرض: مدت کے مطابق ماہانہ اقساط سامنے آگئیں

وزیراعظم اپنا گھر پروگرام ’گھر ہو تو اپنا‘ کے تحت پہلی بار گھر بنانے یا خریدنے کے خواہش مند پاکستانی شہریوں کو آسان شرائط پر ہاؤسنگ فنانسنگ فراہم کی جا رہی ہے۔

اس اسکیم کے تحت اہل درخواست گزار نجی بینکوں سے زیادہ سے زیادہ ایک کروڑ روپے تک قرض حاصل کر سکتے ہیں، جبکہ 40 لاکھ روپے تک کی فنانسنگ بھی آسان ماہانہ اقساط میں دستیاب ہے۔

اس پروگرام کے لیے وہ پاکستانی شہری اہل ہیں جن کے پاس درست قومی شناختی کارڈ موجود ہو اور ان کے نام پہلے سے کوئی رہائشی جائیداد رجسٹرڈ نہ ہو۔ حاصل کیے گئے قرض کو نیا گھر یا فلیٹ خریدنے، پہلے سے موجود پلاٹ پر مکان تعمیر کرنے، یا پلاٹ خرید کر اس پر گھر بنانے کے لیے استعمال کیا جا سکتا ہے۔

اسکیم میں 10 مرلہ یا 2,720 مربع فٹ تک کے مکانات جبکہ 1,500 مربع فٹ تک کے فلیٹس اور اپارٹمنٹس شامل ہیں۔ فنانسنگ میں بینک جائیداد کی قیمت کا 90 فیصد تک قرض فراہم کرتا ہے، جبکہ درخواست گزار کو باقی 10 فیصد رقم بطور ایکویٹی ادا کرنا ہوتی ہے۔

قرض کی زیادہ سے زیادہ مدت 20 سال مقرر کی گئی ہے، جبکہ پہلے 10 سال کے لیے حکومتی مارک اپ سبسڈی بھی فراہم کی جاتی ہے۔ 40 لاکھ روپے کے قرض پر 20 سال کی مدت کے لیے ماہانہ قسط 26,398 روپے بنتی ہے۔ اگر قرض کی مدت 15 سال رکھی جائے تو ماہانہ قسط 31,632 روپے، جبکہ 10 سال کی مدت میں ماہانہ قسط 42,426 روپے ہوگی۔

یوں وزیراعظم اپنا گھر پروگرام ان شہریوں کے لیے ایک اہم موقع فراہم کرتا ہے جو اپنی پہلی رہائشی جائیداد خریدنے یا تعمیر کرنے کے لیے نسبتاً آسان اقساط پر ہاؤسنگ فنانسنگ حاصل کرنا چاہتے ہیں۔