عمان میں 60 سال سے زائد عمر کے غیر ملکی کارکنوں کے ورک پرمٹ کی تجدید روک دی گئی

عمان میں 60 سال سے زائد عمر کے غیر ملکی کارکنوں کے لیے ورک پرمٹ کے اجراء اور تجدید کا عمل روک دیا گیا ہے، جس سے نجی شعبے میں کام کرنے والے عمر رسیدہ تارکین وطن متاثر ہونے کا خدشہ ہے۔

حالیہ ہفتوں کے دوران متعدد غیر ملکی کارکنوں نے بتایا ہے کہ ان کے آجروں کی جانب سے ورک پرمٹ کی تجدید کے لیے جمع کرائی گئی درخواستیں مسترد کی جا رہی ہیں۔ معاملے سے واقف ایک سینئر اہلکار نے بھی تصدیق کی ہے کہ فی الحال 60 سال سے زیادہ عمر کے غیر ملکی کارکنوں کو ورک پرمٹ جاری یا تجدید نہیں کیے جا رہے۔

یہ پیش رفت اس پالیسی میں تبدیلی کی جانب اشارہ کرتی ہے جو جنوری 2022 میں متعارف کرائی گئی تھی۔ اس وقت 60 سال کی عمر مکمل کرنے کے بعد غیر ملکی کارکنوں کے ورک پرمٹ کی تجدید پر عائد سابقہ پابندی ختم کردی گئی تھی، جس کے نتیجے میں تجربہ کار ملازمین کو نجی شعبے میں کام جاری رکھنے کا موقع ملا۔

اس وقت عمان کی وزارت محنت کا مؤقف تھا کہ متعدد کمپنیاں تجربہ کار اور طویل عرصے سے خدمات انجام دینے والے غیر ملکی ملازمین کو 60 سال کی عمر کے بعد بھی ملازمت پر برقرار رکھنے کے لیے خصوصی اجازت کی درخواست کرتی تھیں۔ نئی پالیسی کے ذریعے ایسے کارکنوں کے لیے ورک پرمٹ کی تجدید کا راستہ کھولا گیا تھا۔

موجودہ تبدیلی سے ایسے غیر ملکی ملازمین خاص طور پر متاثر ہوسکتے ہیں جو کئی برسوں سے عمان میں ملازمت کررہے ہیں اور 60 سال کی عمر مکمل ہونے کے باوجود اپنی ملازمت جاری رکھے ہوئے تھے۔

دوسری جانب عمان کی وزارت محنت کی ویب سائٹ پر غیر عمانی کارکنوں کے ورک پرمٹ کی تجدید سے متعلق خدمات اب بھی دستیاب ہیں، تاہم موجودہ معلومات میں عمر کی کوئی واضح حد درج نہیں کی گئی۔

نئی پالیسی کے حوالے سے حتمی اور تفصیلی قواعد سامنے آنے کے بعد یہ واضح ہوسکے گا کہ 60 سال سے زائد عمر کے موجودہ کارکنوں، ان کے آجروں اور پہلے سے جاری ورک پرمٹس کے لیے کیا طریقہ کار اختیار کیا جائے گا۔