جیکب آباد میں کیڈٹ کالج کا افتتاح، ابتدائی طور پر 120 کیڈٹس کا داخلہ

سندھ کے نوجوانوں کو زیورِ تعلیم سے آراستہ کرنے اور معیاری تعلیمی سہولیات کی فراہمی کے لیے کیڈٹ کالج جیکب آباد کا افتتاح کر دیا گیا ہے۔

چیئرمین بورڈ آف گورنرز جی او سی پنوعاقل گیریژن نے کیڈٹ کالج جیکب آباد کا افتتاح کردیا، تقریب میں پاک فوج کے اعلیٰ افسران، سیاسی و سماجی شخصیات اور ممتاز تعلیمی ماہرین نے بڑی تعداد میں شرکت کی۔

یہ بھی پڑھیں : لبنانی وزیر داخلہ احمد الحجار دو روزہ دورے پر پاکستان پہنچ گئے

اس نئے تعلیمی ادارے میں طلبہ کے لیے جدید سائنسی تقاضوں کے مطابق کلاس رومز، کمپیوٹر لیبز اور دیگر تمام ضروری سہولیات فراہم کی گئی ہیں۔

کالج کا پہلا تعلیمی سیشن کل سے شروع ہوگا، جس کے دوران ابتدائی طور پر چھٹی اور ساتویں جماعت کے 120 کیڈٹس کو داخلے دیئے جائیں گے۔

واضح رہے کہ کیڈٹ کالج جیکب آباد کی عمارت کی تعمیر کا آغاز 2023 میں کیا گیا تھا، جسے پاک فوج اور سندھ حکومت نے باہمی تعاون سے پایہ تکمیل تک پہنچایا ہے۔