پنجاب کا اپنی چھت اپنا گھر پروگرام عالمی اعزاز کے لیے منتخب

پنجاب حکومت کے فلیگ شپ ہاؤسنگ منصوبے اپنی چھت اپنا گھر پروگرام کو اقوام متحدہ کے انسانی آبادکاری پروگرام (یو این ہیبی ٹیٹ) کے 2026ء کے ’اسکرول آف آنر‘ ایوارڈ کے لیے منتخب کرلیا گیا ہے۔

پنجاب حکومت کو ایوارڈ وصول کرنے کے لیے 5 اکتوبر کو عمان کے شہر مسقط پہنچنے کی دعوت دی گئی ہے۔ یہ تقریب عالمی یومِ رہائش کے موقع پر منعقد ہوگی۔ یو این ہیبی ٹیٹ کی جانب سے 14 ستمبر کو جاری کیے گئے سرکاری نوٹیفکیشن میں پروگرام کے انتخاب کی تصدیق کی گئی ہے۔

نوٹیفکیشن کے مطابق پنجاب ہاؤسنگ اینڈ ٹاؤن پلاننگ ایجنسی (پھاٹا) کے اپنی چھت اپنا گھر پروگرام نے سخت مسابقتی جائزے کے بعد یہ اعزاز حاصل کیا ہے۔ اقوام متحدہ کی انڈر سیکریٹری جنرل اور یو این ہیبی ٹیٹ کی ایگزیکٹو ڈائریکٹر اناکلاڈیا مارنہیرو سینٹینو روسباخ نے کہا کہ اس پروگرام نے کم آمدنی والے خاندانوں کے لیے مناسب، محفوظ اور کم قیمت گھروں تک رسائی بہتر بنانے میں اہم کردار ادا کیا ہے۔

پھاٹا کے ڈائریکٹر جنرل خواجہ محمد ذیشان سکندر نے بھی پروگرام کے انتخاب کی تصدیق کردی ہے۔ ادارے کو پیر کے روز یو این ہیبی ٹیٹ کی جانب سے ای میل کے ذریعے باضابطہ اطلاع موصول ہوئی۔ ایوارڈ دینے کی تقریب 5 اکتوبر کو مسقط میں ہوگی۔

اس موقع پر مسقط کی انتظامیہ کی جانب سے 6 سے 8 اکتوبر تک مختلف ورکشاپس بھی منعقد کی جائیں گی۔ ان ورکشاپس میں شرکا کو اپنے تجربات، معلومات اور مہارتیں ایک دوسرے کے ساتھ شیئر کرنے کا موقع ملے گا۔ ہاؤسنگ کے شعبے سے متعلق مختلف امور پر بھی تبادلہ خیال کیا جائے گا۔

پنجاب حکومت نے گزشتہ سال اپنی چھت اپنا گھر پروگرام کو اس عالمی اعزاز کے لیے نامزد کروانے کی کوششیں شروع کی تھیں۔ اس منصوبے کا باقاعدہ آغاز اگست 2024ء میں کیا گیا تھا۔ پروگرام کا مقصد کم آمدنی والے خاندانوں کو اپنا گھر بنانے میں مالی مدد فراہم کرنا ہے۔

سرکاری اعداد و شمار کے مطابق 10 ستمبر 2026ء تک صوبے بھر میں 2 لاکھ 72 افراد کو بلاسود قرضوں کی مد میں مجموعی طور پر 259.68 ارب روپے فراہم کیے جاچکے ہیں۔ ان قرضوں کے ذریعے شہریوں کو اپنے گھروں کی تعمیر میں سہولت فراہم کی جارہی ہے۔

یو این ہیبی ٹیٹ کی جانب سے ایوارڈ وصول کرنے والے وفد کے لیے اکانومی کلاس فضائی ٹکٹ، رہائش اور یومیہ اخراجات بھی فراہم کیے جائیں گے۔ پنجاب حکومت کے لیے یہ اعزاز ہاؤسنگ کے شعبے میں ایک اہم عالمی پذیرائی کے طور پر سامنے آیا ہے