نادرا کا بیرون ملک مقیم پاکستانیوں کے لیے اہم پیغام

اسلام آباد: نیشنل ڈیٹا بیس اینڈ رجسٹریشن اتھارٹی (نادرا) نے بیرون ملک مقیم پاکستانیوں کو غیر مجاز ایجنٹس اور اداروں سے محتاط رہنے کی ہدایت کی ہے۔

نادرا نے متحدہ عرب امارات (یو اے ای)، اٹلی اور پرتگال میں مقیم پاکستانیوں سے کہا ہے کہ وہ نادرا اور پاسپورٹ سے متعلق خدمات فراہم کرنے والے غیر مجاز ایجنٹس یا اداروں کے ساتھ کسی قسم کا لین دین نہ کریں۔

نادرا کے مطابق بعض غیر قانونی ایجنٹس شہریوں سے خدمات کے عوض مقررہ فیس سے زیادہ رقم وصول کر رہے ہیں، جبکہ ان کے ذریعے شہریوں کی شناختی معلومات کے غلط استعمال یا چوری کا خدشہ بھی موجود ہے۔

ادارے نے بتایا کہ ایسے غیر مجاز عناصر کے خلاف قانونی کارروائی شروع کردی گئی ہے۔

نادرا نے بیرون ملک مقیم پاکستانیوں پر زور دیا ہے کہ وہ شناختی اور پاسپورٹ سے متعلق خدمات کے لیے صرف مجاز ذرائع سے رجوع کریں۔