کراچی میں گزشتہ رات ہونے والی بارش نے 10 سالہ ریکارڈ توڑ دیا

کراچی: شہر قائد میں گزشتہ رات ہونے والی بارش نے ماہ نومبر کا 10 سالہ ریکارڈ توڑ دیا۔

محکمہ موسمیات کے مطابق ایئرپورٹ پر 5.5 ملی میٹر بارش ریکارڈ ہوئی، اس سے قبل 2014 میں 4.6 ملی میٹر بارش ریکارڈ ہوئی تھی۔

محکمہ موسمیات نے بتایا کہ جناح ٹرمینل 1.4، فیصل بیس 8، مسرور بیس 5 اور کورنگی میں 8.4 ملی میٹر بارش ریکارڈ کی گئی، سعدی ٹاؤن 3، یونیورسٹی روڈ 5، ایئرپورٹ اولڈ ایریا میں 5.5 ملی میٹر بارش ریکارڈ ہوئی۔

یہ بھی پڑھیں: پنجاب میں اسموگ کی بدترین صورتحال : مصنوعی بارش کرنےکا فیصلہ

اس کے علاوہ محکمہ موسمیات کا کہنا ہے کہ کراچی میں بارش برسانے والا سسٹم وسطی سندھ کی جانب جارہا ہے، آج دوپہر کے بعد کراچی میں بارش کا امکان نہیں ہے۔

محکمہ موسمیات کے مطابق چند علاقوں میں ہلکی بارش یا بوندا باندی ہوسکتی ہے، آئندہ ایک ہفتے تک شہر میں بارش کا کوئی امکان نہیں ہے۔