اے ایس پی شہر بانو کو قومی ٹیم کا سربراہ بنانے کی تیاریاں

پاکستان کرکٹ بورڈ (پی سی بی) نے اے ایس پی شہربانو کو پاکستان ویمنز کرکٹ کا سربراہ بنانے پر غور شروع کر دیا ہے۔

اے ایس پی شہربانو نقوی پاکستان ویمنز کرکٹ کی سابق سربراہ تانیہ ملک کے استعفے کے بعد کئی امیدواروں میں شامل ہیں

رپورٹس کے مطابق پی سی بی ویمنز کرکٹ کے نئے سربراہ کی تلاش میں مصروف ہے اور اے ایس پی شہربانو سمیت کئی ہونہار امیدواروں کا جائزہ لے رہا ہے۔

اے ایس پی شہربانو اس سے قبل لاہور کے اچھرہ بازار میں عربی خطاطی والا لباس پہننے پر ہراساں کی جانے والی خاتون کو بچانے کے بعد قومی اور بین الاقوامی میڈیا کی شہ سرخیوں میں آئی تھیں۔

انہیں اپنی پیشہ ورانہ مہارت اور پولیس افسر کی حیثیت سے اپنے فرائض سے وابستگی کی وجہ سے بڑے پیمانے پر سراہا گیا تھا۔

رپورٹ میں بتایا گیا کہ ممکنہ امیدواروں کی فہرست میں ایک سابق ڈپٹی کمشنر بھی شامل ہیں جو اس عہدے کے لیے ایک اور مضبوط امیدوار ہیں۔

پاکستان ویمنز کرکٹ ٹیم کی سابق سربراہ تانیہ ملک نے پی ایس ایل کے ڈائریکٹر صہیب شیخ کے ہمراہ اپنے عہدے سے استعفیٰ دیا تھا۔