جنگ کا مقصد حکومت کی تبدیلی نہیں، میزائل تنصیبات کو تباہ کرنا ہے : امریکی وزیر دفاع

امریکی وزیر دفاع نے کہا ہے کہ ایران ایٹمی ہتھیار حاصل نہیں کر سکتا اور حالیہ کارروائی کا مقصد اس کی میزائل تنصیبات اور بحری ڈھانچے کو تباہ کرنا ہے۔

امریکی وزیر دفاع پیٹ ہیگسیتھ نے پریس کانفرنس میں کہا کہ ایران اب مکمل طور پر بے نقاب ہو چکا ہے اور اسے ایٹمی ہتھیار حاصل کرنے کی اجازت نہیں دی جائے گی۔ انہوں نے واضح کیا کہ جنگ کا مقصد حکومت کی تبدیلی نہیں تھا، لیکن حالات میں نمایاں تبدیلی آ چکی ہے۔

یہ بھی پڑھیں : ایران جنگ میں ٹرمپ کے جنگی مقاصد اور حکمت عملی پر سوالات اٹھنے لگے

انہوں نے بتایا کہ آپریشن کے ابتدائی چوبیس گھنٹوں میں ایک ہزار سے زائد اہداف کو نشانہ بنایا گیا۔ مشترکہ افواج کے سربراہ جنرل ڈین کین کے مطابق کمانڈ سینٹرز اور میزائل تنصیبات کو ترجیحی بنیادوں پر تباہ کیا گیا، جبکہ سائبر کمانڈ نے بھی کارروائی میں حصہ لیا۔

وزیر دفاع نے کہا کہ یہ کسی نہ ختم ہونے والی جنگ نہیں اور نہ ہی عراق جیسی صورتحال ہے۔ انہوں نے ایران میں زمینی افواج بھیجنے کی تردید کی اور کارروائی کو فضائی مہم قرار دیا۔