پینٹاگون میں اکھاڑ پچھاڑ کا سلسلہ تیز، امریکی بحریہ کے سیکریٹری عہدے سے فارغ

امریکہ کی ایران کی بحری ناکہ بندی کے دوران پینٹاگون نے بحریہ کے سیکریٹری جان فیلن کو فوری طور پر عہدے سے برطرف کر دیا ہے۔

امریکی محکمہ دفاع پینٹاگون نے ایک حیران کن اعلان میں بحریہ کے سیکریٹری جان فیلن کو ان کے عہدے سے فوری طور پر برطرف کر دیا ہے۔

پینٹاگون کے ترجمان شان پارنیل نے تصدیق کی ہے کہ جان فیلن فوری طور پر اپنا عہدہ چھوڑ دیں گے اور ان کی جگہ انڈر سیکریٹری ہنگ کاؤ قائم مقام سیکریٹری بحریہ کی ذمہ داریاں سنبھالیں گے۔

اگرچہ پینٹاگون نے جان فیلن کی اچانک رخصتی کی کوئی باضابطہ وجہ بیان نہیں کی، تاہم جان فیلن جو کہ ایک تاجر ہیں اور جن کا کوئی سابقہ فوجی تجربہ نہیں تھا، انہیں 2025 میں صدر ڈونلڈ ٹرمپ کی مہم کے لیے بھاری فنڈز جمع کرنے کے بعد تعینات کیا گیا تھا۔

یہ بھی پڑھیں : امریکی وزیر جنگ پیٹ ہیگستھ کیخلاف مواخذے کا آغاز، چھ سنگین الزامات عائد

ان کی برطرفی ٹرمپ انتظامیہ کے موجودہ دور میں کسی بھی فوجی سروس کے سیکریٹری کی پہلی رخصتی ہے۔ یہ تبدیلی پینٹاگون میں جاری وسیع تر تبدیلیوں کا حصہ ہے، جہاں وزیر جنگ پیٹ ہیگستھ نے عہدہ سنبھالنے کے بعد سے کئی سینئر فوجی افسران کو فارغ کیا ہے۔

جمہوریہ پارٹی کے ایک مشیر کریگ کاٹز نے اس صورتحال پر تبصرہ کرتے ہوئے کہا ہے کہ جنگی حالات کے دوران بحریہ کے سیکریٹری کی برطرفی انتہائی غیر معمولی واقعہ ہے۔

انہوں نے ان دعوؤں کو سادہ لوحی قرار دیا کہ فوجی صورتحال کنٹرول میں ہے۔ ان کا مزید کہنا تھا کہ اگرچہ ہر انتظامیہ میں قیادت کی تبدیلیاں ہوتی ہیں، لیکن ٹرمپ کے دور میں جو کچھ ہو رہا ہے وہ بے مثال ہے۔

انہوں نے الزام لگایا کہ جنرلوں اور وزراء کو اس لیے ہٹایا جا رہا ہے، کیونکہ وہ پیٹ ہیگستھ کے احکامات کی تعمیل نہیں کر رہے یا ان کی پالیسیوں سے اختلاف رکھتے ہیں۔