عید الاضحیٰ کب ہوگی؟ ممکنہ تاریخ کا اعلان ہوگیا

ماہرینِ فلکیات نے عید الاضحیٰ کی ممکنہ تاریخوں کے حوالے سے ابتدائی تخمینہ جاری کر دیا ہے۔ تاہم حتمی اعلان حکومت اور رویتِ ہلال کمیٹی کے فیصلے کے بعد ہی کیا جائے گا۔

تفصیلات کے مطابق امارات آسٹرونومی سوسائٹی کے چیئرمین ابراہیم الجروان نے سال 2026 (1447 ہجری) کیلئے فلکیاتی حسابات کی بنیاد پر عید الاضحیٰ کی ممکنہ تاریخوں کا اعلان کیا ہے۔ ان کا کہنا ہے کہ یہ تمام اندازے سائنسی مشاہدات اور جدید فلکیاتی ڈیٹا پر مبنی ہیں۔

فلکیاتی رپورٹ کے مطابق چاند کی پیدائش اتوار 17 مئی کو متحدہ عرب امارات کے وقت کے مطابق رات 12 بج کر 1 منٹ پر ہوگی۔ اسی دن سورج غروب ہونے کے بعد چاند تقریباً 58 منٹ تک افق پر موجود رہے گا، جس سے مختلف علاقوں میں اس کی رویت کے امکانات بہتر ہو سکتے ہیں۔

ابتدائی فلکیاتی شیڈول کے مطابق یکم ذی الحج 18 مئی (پیر) کو ہونے کا امکان ظاہر کیا گیا ہے۔ اس کے بعد یومِ عرفہ 26 مئی (منگل) جبکہ عید الاضحیٰ 27 مئی (بدھ) کو منائے جانے کا امکان ہے۔ تاہم یہ تمام تاریخیں صرف اندازے ہیں۔

ماہرین نے واضح کیا ہے کہ حتمی فیصلہ صرف رویتِ ہلال کمیٹی کے اجلاس اور چاند نظر آنے کے بعد ہی کیا جائے گا۔