ایران امریکا مذاکرات اگلے ہفتے اسلام آباد میں دوبارہ شروع ہونے کا امکان

امریکا اور ایران کے درمیان جاری سفارتی کوششوں کے حوالے سے اہم پیش رفت سامنے آئی ہے۔

امریکی اخبار دی وال اسٹریٹ جرنل کی رپورٹ کے مطابق دونوں ممالک کے درمیان مذاکرات اگلے ہفتے اسلام آباد میں بحال ہو سکتے ہیں جس کا مقصد خطے میں کشیدگی کم کرنا اور ممکنہ جنگ کے خطرے کو ٹالنا ہے۔

رپورٹ کے مطابق دونوں فریق ثالثی کردار ادا کرنے والوں کی مدد سے ایک مختصر مگر جامع مفاہمتی مسودہ تیار کرنے پر کام کر رہے ہیں۔ اس مجوزہ دستاویز میں آئندہ مذاکرات کیلئے ایک ماہ کا فریم ورک طے کرنے کی تجویز شامل ہے۔ اس کا مقصد بات چیت کو منظم انداز میں آگے بڑھانا اور کسی ممکنہ کشیدگی کو کم کرنا ہے۔

مسودے میں ایران کے جوہری پروگرام پر گفتگو، خطے میں کشیدگی کم کرنے کے اقدامات اور یورینیم کے ذخائر سے متعلق معاملات شامل ہو سکتے ہیں۔ ان امور پر بات چیت کو اہم سمجھا جا رہا ہے کیونکہ یہ خطے کے امن اور استحکام سے جڑے ہوئے ہیں۔ تاہم ابھی کئی اہم نکات پر اتفاق نہیں ہو سکا۔

ذرائع کے مطابق پابندیوں میں نرمی کا معاملہ بھی زیر بحث ہے۔ اسی نکتے پر دونوں فریقوں کے درمیان اختلاف پایا جاتا ہے۔ اگر اس مسئلے پر پیش رفت نہ ہوئی تو مذاکرات کی رفتار متاثر ہو سکتی ہے۔ لیکن اگر بات چیت مثبت رہی تو ابتدائی مدت میں توسیع بھی ممکن ہو سکتی ہے۔

یاد رہے کہ اس سے قبل پاکستان اور امریکا کے درمیان مذاکرات کا پہلا دور 11 اپریل کو اسلام آباد میں منعقد ہوا تھا۔ اس ملاقات میں دونوں ممالک کے وفود نے تقریباً 21 گھنٹے تک گفتگو کی تھی۔ تاہم اس دور کے اختتام پر کوئی حتمی معاہدہ طے نہیں پایا تھا۔