چین کے J-10C طیارے پانچ سو کلومیٹر تک مار کرنے والے میزائل سے لیس کر دیئے گئے

چین نے اپنے J-10C لڑاکا طیارے کو دنیا کے طویل ترین فاصلے تک مار کرنے والے پی ایل سیونٹین میزائل سے لیس کر دیا ہے، جو فضائی جنگ میں چین کی برتری کو مزید مستحکم کرے گا۔

چین کی فضائیہ نے اپنی طاقت میں اضافے کے لیے ایک بڑا قدم اٹھاتے ہوئے J-10C لڑاکا طیاروں کو دنیا کے مہلک ترین اور طویل فاصلے تک مار کرنے والے پی ایل سیونٹین میزائلوں سے لیس کرنا شروع کر دیا ہے۔

گیارہ مئی کو جاری ہونے والی تصاویر سے اس بات کی تصدیق ہوئی ہے کہ یہ طیارے اب ان مخصوص پائلنز کے ساتھ اڑان بھر رہے ہیں، جو صرف پی ایل سیونٹین جیسے بڑے میزائلوں کے لیے استعمال کیے جاتے ہیں۔

یہ بھی پڑھیں : یورپی یونین کی چینی ٹیکنالوجی پر پابندی سے معاشی خودکشی

اس سے قبل یہ میزائل صرف چین کے بڑے جے اسکسٹین طیاروں تک محدود تھے، لیکن اب انہیں J-10C جیسے کثیر المقاصد طیاروں کا حصہ بنا دیا گیا ہے۔

پی ایل سیونٹین میزائل کی رینج تقریباً پانچ سو کلومیٹر بتائی جاتی ہے، جو اسے اپنے تمام عالمی حریفوں سے ممتاز بناتی ہے۔

اگرچہ J-10C کا اپنا ریڈار چھوٹا ہے، لیکن یہ طیارہ سیٹلائٹ کورس کریکشن اور پانچویں نسل کے جے ٹوئنٹی طیاروں کے تعاون سے اپنے ہدف کو درست طریقے سے نشانہ بنانے کی صلاحیت رکھتا ہے۔

ماہرین کے مطابق اس انضمام سے چین کی فضائی دفاعی اور جارحانہ صلاحیتوں میں بے پناہ اضافہ ہوا ہے اور اب وہ بہت دور سے ہی دشمن کے طیاروں کو فضا میں تباہ کرنے کی پوزیشن میں آ گیا ہے۔