امریکہ کا کینیڈا کے ساتھ دوسری جنگ عظیم سے قائم تاریخی دفاعی معاہدہ معطل کرنے کا اعلان

امریکی انتظامیہ نے کینیڈا پر اپنے دفاعی وعدوں کو پورا نہ کرنے کا الزام عائد کرتے ہوئے دوسری جنگ عظیم کے دور سے جاری دونوں ممالک کے درمیان مشترکہ براعظمی دفاعی بورڈ میں اپنی شرکت معطل کرنے کا اعلان کر دیا ہے۔

امریکہ نے کینیڈا کے ساتھ دوسری جنگ عظیم کے وقت سے قائم اپنے تاریخی مشترکہ دفاعی تعاون کو معطل کرنے کا باقاعدہ اعلان کر دیا ہے اور کینیڈا پر الزام لگایا ہے کہ وہ اپنی دفاعی ذمہ داریوں کو پورا کرنے میں مکمل طور پر ناکام رہا ہے۔

امریکی نائب وزیر جنگ ایلبرج کولبی نے سوشل میڈیا پر جاری ایک بیان میں واضح کیا کہ ان کا محکمہ کینیڈا کے ساتھ دفاعی بورڈ میں اپنی شمولیت کو عارضی طور پر روک رہا ہے تاکہ اس فورم سے حاصل ہونے والے فوائد کا نئے سرے سے جائزہ لیا جا سکے۔

یہ بھی پڑھیں : کینیڈا، آسٹریلیا اور برطانیہ سمیت 10 ممالک کا لبنان میں فوری جنگ بندی کا مطالبہ

یہ اہم بورڈ دوسری جنگ عظیم کے دور سے علاقائی سلامتی کے لیے ایک فعال فورم کے طور پر کام کر رہا تھا، تاہم صدر ڈونلڈ ٹرمپ کے دوبارہ برسرِاقتدار آنے کے بعد سے دونوں پڑوسی ممالک کے تعلقات شدید کشیدگی کا شکار ہیں۔

امریکی نائب وزیر جنگ کے مطابق امریکہ اب کینیڈا کے کھوکھلے دعوؤں اور حقیقت کے درمیان موجود فرق کو مزید نظر انداز نہیں کر سکتا۔

یہ فیصلہ ٹرمپ انتظامیہ کی جانب سے اپنے مغربی اتحادیوں پر مسلسل کی جانے والی تنقید کا حصہ ہے، جن کے بارے میں صدر ٹرمپ کا خیال ہے کہ وہ امریکی فوجی طاقت پر حد سے زیادہ انحصار کرتے ہیں۔

دوسری جانب اتحادی ممالک نے ان الزامات کو مسترد کرتے ہوئے کہا ہے کہ وہ اپنے فوجی اخراجات بڑھا رہے ہیں اور کینیڈا کے وزیر اعظم مارک کارنی نے بھی گزشتہ سال دفاعی بجٹ کو مجموعی قومی پیداوار کے پانچ فیصد تک بڑھانے کا عزم ظاہر کیا تھا۔