عوامی مزاحمت نے اسرائیل کو جنگ بندی پر مجبور کیا، ایرانی صدر کا 12 روزہ جنگ کی پہلی برسی پر پیغام

ایران کے صدر نے اسرائیل کے خلاف 12 روزہ جنگ کی پہلی برسی پر اپنے پیغام میں ایرانی عوام کی اتحاد اور ہمت کی تعریف کی ہے۔

ایرانی صدر مسعود پزیشکیان نے اسرائیل کے خلاف گزشتہ سال ہونے والی 12 روزہ جنگ کو قومی یکجہتی کی علامت قرار دیا اور لڑائی کے دوران جان دینے والے افراد کو خراج عقیدت پیش کیا۔

انہوں نے کہا کہ اسرائیلی حکومت نے یہ سوچ کر غلط اندازہ لگایا تھا کہ سینیئر فوجی قیادت اور اہم تنصیبات پر حملے کرکے وہ ایرانی قوم کو کمزور اور ملک کو غیر مستحکم کر دے گی۔

یہ بھی پڑھیں : امریکہ اور ایران آج ورچوئل اجلاس میں معاہدے پر الیکٹرانک دستخط کریں گے، امریکی میڈیا

ان کا کہنا تھا کہ ایرانی عوام کی مزاحمت، رہبر معظم آیت اللہ علی خامنہ ای شہید کی قیادت اور مسلح افواج کی تیاری نے اسرائیل کو اپنے اہداف حاصل کرنے سے روک دیا اور آخر کار اسے جنگ بندی قبول کرنے پر مجبور کیا۔

یہ جنگ گزشتہ سال 13 جون کو اس وقت شروع ہوئی تھی، جب اسرائیل نے ایران پر اچانک حملہ کرکے سینیئر فوجی رہنماؤں، جوہری سائنسدانوں، سیاست دانوں اور عام شہریوں کو نشانہ بنایا تھا۔

بعد میں امریکا بھی اس جنگ میں شامل ہو گیا تھا اور اس نے ایران کی جوہری سائنس کی اہم جگہوں فردو، نتانز اور اصفہان پر حملے کیے۔ یہ شدید تنازعہ گزشتہ سال 24 جون کو ختم ہوا تھا۔