12 ارب ڈالر کے منجمد ایرانی اثاثوں کی بحالی کا معاہدہ طے پا گیا، باقر قالیباف

ایرانی اسپیکر کا کہنا ہے کہ سوئزرلینڈ مذاکرات کے دوران امریکہ کے ساتھ 12 ارب ڈالر کے منجمد اثاثوں کے اجرا کے معاہدے کو حتمی شکل دے دی گئی، لبنان کی خودمختاری کی ضمانت پر اتفاق ہوا ہے۔

ایرانی پارلیمنٹ کے اسپیکر باقر قالیباف نے کہا ہے کہ واشنگٹن کے ساتھ سوئزرلینڈ مذاکرات کے دوران لبنان، آبنائے ہرمز میں بحری سیکیورٹی اور پابندیوں و منجمد اثاثوں سے متعلق اقتصادی اقدامات پر مشترکہ میکانزم اور مفاہمت حاصل کر لی گئی ہے۔

انہوں نے بتایا کہ مذاکرات کے نتیجے میں تال میل کے ایسے فریم ورک تیار کیے گئے ہیں، جن کا مقصد لبنان کی خودمختاری اور علاقائی سالمیت کی حمایت کرنا ہے، اس کے ساتھ زمین پر جنگ کے بعد کے انتظامات کو سنبھالنے کے طریقہ کار پر بھی اتفاق ہوا ہے۔

باقر قالیباف کے مطابق، ان مذاکرات کے تحت لبنان میں کوآرڈینیشن مراکز قائم کرنے پر اتفاق کیا گیا ہے، تاکہ بے گھر ہونے والے لبنانی شہریوں کی واپسی میں آسانی ہو اور لبنانی سرزمین سے قابض افواج کے انخلا کی نگرانی کی جا سکے۔

یہ بھی پڑھیں : ایرانی خطرات عالمی معاشی بحران سے کہیں بڑے ہیں، معاہدہ نہ مانا تو کارروائی ہوگی، ڈونلڈ ٹرمپ

انہوں نے مزید کہا کہ ایک اور رابطہ کار نظام لبنان میں سیز فائر کے انتظامات کی ممکنہ خلاف ورزیوں کی نگرانی اور تحقیقات کا ذمہ دار ہوگا تاکہ تنازعات کا باقاعدہ حل یقینی بنایا جا سکے۔

ایرانی اسپیکر نے تصدیق کی کہ ضرورت پڑنے پر امریکی نائب صدر جے ڈی وینس کے ساتھ ممکنہ ملاقاتوں کے انتظامات بھی کیے گئے ہیں، جس کا مقصد مفاہمت کی یادداشت پر فالو اپ کرنا اور بقایا اختلافات کو حل کرنا ہے۔

انہوں نے ان چینلز کو جاری رابطہ عمل کا حصہ قرار دیا جو فریقین کے درمیان بات چیت کو برقرار رکھنے اور کشیدگی کو روکنے کے لیے بنائے گئے ہیں۔

علاقائی بحری امور پر بات کرتے ہوئے انہوں نے کہا کہ دنیا کی اس اہم ترین بحری گزرگاہ میں کسی بھی قسم کے تصادم سے بچنے کے لیے آبنائے ہرمز میں جہازوں کی آمدورفت پر رابطے کا نظام قائم کرنے پر اتفاق کیا گیا ہے۔

وہ سلطنت عمان کے دورے کے دوران اس آبنائے کے انتظام کو مزید مضبوط کریں گے، جبکہ حتمی معاہدے تک ایران کے تیل اور پیٹرو کیمیکل کی برآمدات پر عائد پابندیوں میں عارضی طور پر نرمی کر دی گئی ہے۔