ایران جنگ ٹرمپ کی بڑی سیاسی غلطی قرار، امریکی عوام نے سروے میں کشیدگی ختم کرنے کا مطالبہ کردیا

امریکہ میں ہونے والے ایک نئے عوامی سروے کے مطابق، صدر ڈونلڈ ٹرمپ کی جانب سے ایران کے ساتھ جنگ کا فیصلہ ایک بڑی سیاسی غلطی دکھائی دے رہا ہے، اور 78 فیصد امریکی اب اس جنگ کو فوری طور پر ختم کرنا چاہتے ہیں۔

ٹرمپ انتظامیہ کی جانب سے ایران کے ساتھ مفاہمت کی یادداشت پر دستخط کے بعد سی بی ایس نیوز اور یوگاو کی طرف سے کیے گئے ایک بڑے عوامی سروے کے نتائج سامنے آئے ہیں۔

اس سروے میں 78 فیصد امریکیوں نے کہا ہے کہ وہ مزید مراعات کے انتظار کے بجائے اب اس جنگ کا فوری خاتمہ چاہتے ہیں، جبکہ صرف 22 فیصد نے جنگ جاری رکھنے کی حمایت کی۔

اگرچہ ٹرمپ کے مشیر اس کو اپنی کامیابی کہہ رہے ہیں، لیکن سروے سے معلوم ہوتا ہے کہ عوام اس معاہدے کو امریکہ کے لیے اچھا نہیں سمجھتے۔

صرف 22 فیصد امریکیوں کا خیال ہے کہ یہ معاہدہ امریکہ کے لیے بہتر ہے، جبکہ 37 فیصد کے مطابق یہ ایران کے لیے زیادہ فائدہ مند ہے۔

یہ بھی پڑھیں : ایرانی خطرات عالمی معاشی بحران سے کہیں بڑے ہیں، معاہدہ نہ مانا تو کارروائی ہوگی، ڈونلڈ ٹرمپ

یہاں تک کہ ٹرمپ کی اپنی ریپبلکن پارٹی کے صرف 39 فیصد لوگ اسے امریکہ کی جیت مانتے ہیں۔ سروے میں 45 فیصد لوگوں نے اس جنگ کو تزویراتی طور پر ناکام قرار دیا ہے۔

ٹرمپ کا سب سے بڑا مقصد ایران کے جوہری پروگرام کو مستقل طور پر روکنا تھا، لیکن 69 فیصد امریکیوں اور 45 فیصد ریپبلکنز کا ماننا ہے کہ یہ معاہدہ ایران کو جوہری ہتھیار بنانے سے نہیں روک سکے گا۔ اس کے علاوہ 57 فیصد اکثریت کا کہنا ہے کہ اس جنگ نے مسائل حل کرنے کے بجائے مزید نئے مسائل پیدا کیے ہیں۔

سروے کے مطابق 64 فیصد لوگوں کا خیال ہے کہ اس جنگ نے عالمی معیشت کو ٹرمپ انتظامیہ کی توقعات سے کہیں زیادہ نقصان پہنچایا کیونکہ وہ ایران کی طرف سے آبنائے ہرمز کو بند کرنے کی صلاحیت کا درست اندازہ نہیں لگا سکے تھے۔

امریکی عوام اب اس جنگ سے ذہنی طور پر تھک چکے ہیں کیونکہ جو جنگ 4 سے 6 ہفتوں میں ختم ہونی تھی وہ 4 ماہ تک کھینچ گئی ہے، اور دو تہائی امریکیوں کا ماننا ہے کہ ٹرمپ انتظامیہ اب صرف اس تنازع سے پیچھا چھڑانا چاہتی ہے۔