ٹرمپ نے ایران جنگ سے امریکی اسلحہ ذخائر میں ہونے والی کمی پر اہم اجلاس طلب کر لیا

امریکی صدر نے ایران کے ساتھ حالیہ تنازع کے بعد امریکی اسلحہ ذخائر میں ہونے والی کمی کے خدشات کے پیشِ نظر پینٹاگون حکام اور ملک کی بڑی اسلحہ ساز کمپنیوں کا ہنگامی اجلاس طلب کر لیا۔

امریکی صدر ڈونلڈ ٹرمپ نے اس ہفتے وائٹ ہاؤس میں وزارتِ دفاع یعنی پینٹاگون کے اعلیٰ حکام اور دفاعی صنعت کی بڑی کمپنیوں کے سربراہان کا ایک اہم اجلاس طلب کر لیا ہے، جس کا بنیادی مقصد میزائلوں اور گولہ بارود کی پیداوار میں فوری تیزی لانا ہے۔

یہ ہنگامی اقدام ایران کے ساتھ حالیہ تنازع کے دوران بڑے پیمانے پر جنگی ساز و سامان کے استعمال کے باعث امریکی ذخائر میں کمی کے سنگین خدشات کے پیشِ نظر کیا جا رہا ہے۔

وال اسٹریٹ جریدے کی رپورٹ کے مطابق یہ اجلاس پہلے جون کے وسط میں ہونا تھا، تاہم ایران کے ساتھ جنگ بندی پر ختم ہونے والے مذاکرات کے باعث اسے کچھ وقت کے لیے مؤخر کر دیا گیا تھا۔

اس اہم اجلاس میں پینٹاگون کے سینیئر حکام کے علاوہ دفاعی شعبے کی مایہ ناز کمپنیوں لاکھیڈ مارٹن، آر ٹی ایکس (ریتھیون)، بوئنگ، نارتھروپ گرومن اور ہنی ویل کے چیف ایگزیکٹو افسران بھی شریک ہوں گے۔

یہ بھی پڑھیں : ایران کے بعد کیا ترکیہ اسرائیل کا اگلا ہدف ہو سکتا ہے؟

اجلاس کے دوران خاص طور پر پیٹریاٹ دفاعی نظام کے انٹرسیپٹر میزائلوں، ٹوماہاک میزائلوں اور دیگر جدید دفاعی نظاموں، جیسے تھاڈ اور پریسم کی پیداوار میں بڑے پیمانے پر تیزی لانے پر غور کیا جائے گا۔

رپورٹ میں بتایا گیا ہے کہ پینٹاگون ان کمپنیوں کے ساتھ ابتدائی معاہدے کر چکا ہے، تاہم پیداوار کو جنگی بنیادوں پر بڑھانے کے لیے اب بھی کانگریس سے مالی منظوری حاصل کرنا باقی ہے۔

اندازہ ہے کہ پینٹاگون اس توسیعی منصوبے کو پورا کرنے کے لیے مالی سال 2027 کے بجٹ میں بھاری فنڈز کی درخواست کرے گا۔

صدر ٹرمپ اس سے قبل دفاعی پیداوار کو تیز کرنے کے لیے ڈیفنس پروڈکشن ایکٹ بھی نافذ کر چکے ہیں، تاکہ فوجی ساز و سامان کی تیاری میں آنے والی رکاوٹوں کو دور کیا جا سکے۔

سینٹر فار اسٹریٹیجک اینڈ انٹرنیشنل اسٹڈیز کے مطابق ایران کے خلاف کارروائیوں کے دوران امریکی میزائلوں اور فضائی دفاعی نظام کے ذخائر کا ایک بہت بڑا حصہ استعمال ہو چکا ہے، جس کے نتیجے میں امریکی فوج کی جنگی تیاری اور صلاحیت متاثر ہونے کے شدید خدشات پیدا ہو گئے ہیں۔