کیا مریخ میں انٹرنیٹ کی رفتار زمین کے مقابلے میں زیادہ ہوگی؟ ناسا نے بتا دیا

امریکی خلائی ادارے (ناسا) کی نئی ٹیکنالوجی کی بدولت مریخ پر برطانیہ کے بڑے حصوں سے پہلے تیز رفتار انٹرنیٹ تک رسائی ممکن ہے۔

یہ بات قابل ذکر ہے کہ تیز براڈ بینڈ انٹرنیٹ کی دستیابی کی فہرست میں متحدہ عرب امارات کا پہلا نمبر ہے جہاں انٹر نیٹ اسپیڈ کم وبیش 300 ایم بیز ہے جب کہ برطانیہ 120 ایم بیز اور پاکستان 15 ایم بیز کے ساتھ بالترتیب فہرست میں 42 اور 138 نمبر پر ہے۔

اگرچہ برطانیہ بھر میں لاکھوں افراد اب بھی تیز انٹرنیٹ سروس حاصل کرنے کے لیے جدوجہد کر رہے ہیں، ناسا کے ‘ڈیپ اسپیس’ انٹرنیٹ نیٹ ورک کے منصوبوں پر پیش رفت ہو رہی ہے  اور مریخ کو سب سے پہلے فائدہ پہنچنے والا ہے۔

ڈیپ اسپیس آپٹیکل کمیونی کیشنز (ڈی ایس او سی) نامی اس نئی ٹیکنالوجی کو فی الحال ناسا کے سائیکی خلائی جہاز پر آزمایا جا رہا ہے اور اس کے نتائج اب تک امید افزا رہے ہیں۔

یہ نظام ڈیٹا منتقل کرنے کے لئے روایتی ریڈیائی لہروں کے بجائے طاقتور لیزر کا استعمال کرتا ہے  جو موجودہ طریقوں کے مقابلے میں 100 گنا تیز رفتار پیش کرتا ہے۔

ڈی ایس او سی نے پہلے ہی لاکھوں کلومیٹر دور سے ہائی ڈیفینیشن ویڈیوز اور پیچیدہ ڈیٹا بھیجنے کی صلاحیت کا مظاہرہ کیا ہے۔

یہ ٹیکنالوجی پہلے ہی 460 ملین کلومیٹر سے ڈیٹا بھیجنے کی صلاحیت رکھتی ہے جو زمین اور مریخ کے درمیان فاصلے سے بھی زیادہ ہے۔

زمین اور مریخ کے درمیان 53 ملین کلومیٹر کے فاصلے پر ڈی ایس او سی نے تیز رفتار انٹرنیٹ کے دائرے میں 267 میگا بائٹس فی سیکنڈ کی رفتار حاصل کی۔

اگرچہ ٹیکنالوجی ابھی اپنے تجرباتی مرحلے میں ہے ، لیکن اس کے مضمرات بہت وسیع ہیں۔ مریخ کے لیے اس کا مطلب یہ ہو سکتا ہے کہ ہم روورز، آربیٹرز اور یہاں تک کہ مستقبل کے انسانی مشنز کے ساتھ بات چیت کرنے کے طریقے میں ایک بہت بڑی پیش رفت کریں۔

لیکن زمین پر، مواصلات کی یہ انقلابی پیش رفت ان لوگوں کے لئے افسوس کی بات ہوگی جو اب بھی سست انٹرنیٹ کی رفتار کے ساتھ جدوجہد کر رہے ہیں. برطانیہ میں دیہی علاقوں کا ایک بڑا حصہ اب بھی تیز رفتار براڈ بینڈ تک رسائی کا انتظار کر رہا ہے، جس سے بہت سے علاقوں کو کنکٹیویٹی کے مسائل درپیش ہیں۔