ستلج میں پانی کے بہاؤ میں اضافہ، پاک پتن کے 23 گاؤں ڈوب گئے، 64 ہزار سے زائد آبادی متاثر

بھارت کی جانب سے دریائے ستلج میں ریلے پر ریلے چھوڑںے کا سلسلہ جاری ہے تازہ ریلوں کی زد میں آکر پاک پتن کے 23 گاؤں مکمل ڈوب گئے۔ سیلابی صورت حال کے باعث 64 ہزار سے زائد آبادی متاثر ہوگئی۔

ذرائع کے مطابق بھارت نے پہلے پاکستان میں بھارتی ہائی کمیشن کے ذریعے وزارت آبی وسائل کو دریائے ستلج میں پانی چھوڑےجانے سے متعلق  آگاہ کیا جس کے بعد وزارت آبی وسائل نے فلڈ الرٹ جاری کردیا۔

پی ڈی ایم اے پنجاب کا کہنا ہےکہ بھارت کی جانب سے پانی چھوڑے جانے کے باعث دریائے ستلج میں پانی کے بہاؤ میں مزید اضافہ ہوگا جب کہ دریائے ستلج میں اس وقت ہریکے ڈاؤن اسٹریم اور فیروزپور ڈاؤن اسٹریم میں اونچے درجے کا سیلاب ہے۔

دوسری جانب دریائے ستلج میں ہیڈ سلیمانکی کےمقام پر اونچے درجے کا سیلاب ہے اور اب تک ضلع پاکپتن کے سیلاب زدہ علاقوں سے24974 افراد کا انخلا کیا گیا ہے۔

فلڈ کنٹرول روم کے مطابق سیلاب سے 23 گاؤں مکمل ڈوب گئے اور  53 گاؤں جزوی زیرآب آئے ہیں، ضلع میں 64663 آبادی متاثر اور  66913 ایکڑ رقبہ سیلاب کی نذر ہوگیا جب کہ سیلابی علاقے سے 4106 مویشیوں کو محفوظ مقامات پر منتقل کیا گیا ہے۔