گوگل میپ استعمال کرنے والے نوجوان کے ساتھ دل دہلا دینے والا واقعہ!!!

ٹیکنالوجی نے جہاں زندگی کو آسان بنایا ہے، وہیں اس پر حد سے زیادہ انحصار بعض اوقات خطرناک بھی ثابت ہو جاتا ہے۔

ایسا ہی ایک واقعہ حال ہی میں بھارت میں پیش آیا، جہاں گوگل میپ پر بھروسہ کرنا ایک نوجوان کو مہنگا پڑ گیا۔ موٹر سائیکل سوار نوجوان راستہ دیکھتے ہوئے اندھیرے میں ایک کنویں میں جا گرا اور اپنی جان خطرے میں ڈال بیٹھا۔

یہ واقعہ بھارتی شہر لکھنو کے قریب پیش آیا۔ متاثرہ نوجوان رتیش جیسوال موٹر سائیکل پر اپنے آبائی گاؤں جا رہا تھا۔ اس نے راستے کے لیے گوگل میپ کا سہارا لیا ہوا تھا۔ رات کے وقت روشنی کم ہونے کے باعث اسے سامنے موجود کنواں نظر نہ آ سکا اور وہ سیدھا اس میں جا گرا۔

کنویں میں گرنے کے بعد نوجوان نے مدد کے لیے زور زور سے آوازیں لگائیں۔ خوش قسمتی سے قریب ہی گشت پر موجود ایک پولیس اہلکار نے اس کی آواز سن لی۔ پولیس اہلکار فوری طور پر موقع پر پہنچا تو دیکھا کہ ایک موٹر سائیکل کنویں کے پاس گری ہوئی ہے اور نوجوان پانی میں ہے۔

پولیس اہلکار نے حاضر دماغی کا مظاہرہ کرتے ہوئے اپنے پاس موجود رومالوں کو آپس میں باندھا اور انہیں رسی کی شکل دے کر کنویں میں پھینکا۔ نوجوان نے رسی کو پکڑا اور پولیس کی مدد سے بحفاظت باہر نکال لیا گیا۔ بعد ازاں اسے ابتدائی طبی امداد بھی دی گئی۔

پولیس کا کہنا ہے کہ اگر بروقت مدد نہ ملتی تو یہ واقعہ جان لیوا بھی ثابت ہو سکتا تھا۔ واقعے کے بعد ایک بار پھر یہ بات سامنے آئی ہے کہ گوگل میپ یا دیگر نیویگیشن ایپس پر مکمل بھروسہ کرنا بعض اوقات خطرناک ہو سکتا ہے، خاص طور پر رات کے وقت یا غیر مانوس علاقوں میں۔