تعلیمی اداروں سے متعلق محکمہ تعلیم نے اہم اعلان کردیا

محکمہ تعلیم سندھ نے پرائیویٹ اسکولوں میں غیر قانونی رہائش اور کمرشل سرگرمیوں پر سخت کارروائی کا فیصلہ کر لیا ہے۔ اسکولوں کی عمارتیں اب صرف تعلیمی مقاصد کے لیے استعمال ہوں گی اور کسی بھی قسم کی دکانیں، رہائش یا دیگر تجارتی سرگرمیاں ممنوع قرار دی گئی ہیں۔

محکمہ تعلیم کے مطابق تمام نجی اسکولوں کی باقاعدہ انسپکشن کی جائے گی۔ اسکول انتظامیہ کو اپنی عمارت کے اسٹرکچرل فٹنس سرٹیفکیٹ جمع کروانے ہوں گے۔ خستہ حال یا غیر محفوظ عمارتوں میں قائم اسکول خالی کروانے کی ہدایت بھی جاری کی گئی ہے تاکہ طلبہ اور عملے کی حفاظت یقینی بنائی جا سکے۔

اس پابندی کی خلاف ورزی کرنے والے اسکولوں کی رجسٹریشن معطل یا منسوخ کی جا سکتی ہیں۔ اگر اسکول میں غیر تعلیمی سرگرمیاں پائی گئیں تو متعلقہ اسکول کو سیل بھی کیا جا سکتا ہے۔ محکمہ تعلیم نے واضح کیا ہے کہ اسکولوں میں کسی بھی حادثے کی صورت میں مکمل ذمہ داری اسکول انتظامیہ پر ہوگی۔