کچھ پلگز میں 3 پنز کیوں ہوتی ہیں؟ دلچسپ وجہ سامنے آگئی

گھروں میں استعمال ہونے والے برقی پلگز کو اگر غور سے دیکھا جائے تو کچھ پلگ دو پنز کے ہوتے ہیں جبکہ بعض میں تین پنز موجود ہوتی ہیں۔

 اکثر لوگ یہ سوال کرتے ہیں کہ آخر تیسری پن کی ضرورت کیوں پیش آتی ہے، خاص طور پر اس وقت جب بیشتر گھروں میں تین پن والا پلگ لگانے کے لیے اضافی انتظام کرنا پڑتا ہے۔

درحقیقت پلگ میں موجود تیسری پن کو گراؤنڈ پن کہا جاتا ہے، اور یہ ایک اہم حفاظتی حصہ ہے۔ اس کا بنیادی مقصد صارف اور برقی آلات کو ممکنہ برقی نقصانات سے محفوظ رکھنا ہوتا ہے۔ پلگ کی دو پنز بجلی کو آلے تک پہنچاتی ہیں، جبکہ تیسری پن اضافی یا خطرناک کرنٹ کو محفوظ راستہ فراہم کرتی ہے۔

جب کسی برقی آلے کے اندر خرابی پیدا ہو جائے یا تاروں میں شارٹ سرکٹ ہو تو گراؤنڈ پن اضافی بجلی کو زمین میں منتقل کر دیتی ہے۔ اس عمل سے بجلی آلے میں جمع نہیں ہوتی اور نہ ہی انسان کو کرنٹ لگنے کا خطرہ رہتا ہے۔ یہی وجہ ہے کہ ہیوی مشینری اور زیادہ بجلی استعمال کرنے والے آلات میں تین پن والا پلگ زیادہ محفوظ سمجھا جاتا ہے۔

یہ گراؤنڈ پن گھر کے برقی نظام میں موجود ایک مخصوص تار سے جڑی ہوتی ہے، جسے گراؤنڈ وائر کہا جاتا ہے۔ یہ تار زمین کے ساتھ منسلک ہوتی ہے۔ کسی بھی غیر معمولی صورتحال میں یہ تار اضافی بجلی کو سیدھا زمین تک پہنچا دیتی ہے، جس سے بڑے حادثات سے بچاؤ ممکن ہوتا ہے۔

اکثر لوگ یہ بھی پوچھتے ہیں کہ اگر تیسری پن اتنی ضروری ہے تو تمام پلگز میں اسے کیوں شامل نہیں کیا جاتا۔ ماہرین کے مطابق اس کی وجہ یہ ہے کہ ہر برقی آلے کو گراؤنڈنگ کی ضرورت نہیں ہوتی۔ کم بجلی استعمال کرنے والے اور ہلکے آلات عموماً پلاسٹک یا محفوظ میٹریل سے تیار کیے جاتے ہیں، جن کے لیے دو پن والا پلگ کافی ہوتا ہے۔

ماہرین کا کہنا ہے کہ جہاں ممکن ہو، تین پن والے پلگز کا استعمال کرنا زیادہ محفوظ ہے، خاص طور پر ہیٹر، فریج، واشنگ مشین اور دیگر بھاری برقی آلات کے لیے۔ اس سے نہ صرف آلات کی عمر بڑھتی ہے بلکہ انسانی جان کا تحفظ بھی یقینی بنایا جا سکتا ہے۔