طوبیٰ انور نے برطانیہ میں نیا آئی فون چوری ہونے کی تفصیلات بتادیں

پاکستانی ڈرامہ انڈسٹری کی معروف اداکارہ سیدہ طوبیٰ انور نے حال ہی میں برطانیہ میں پیش آنے والے ایک ناخوشگوار واقعے کا ذکر کیا ہے۔

اداکارہ سیدہ طوبیٰ انور نے نجی ٹی وی کے پروگرام میں شرکت کی جہاں انہوں نے بتایا کہ لندن میں قیام کے دوران ان کا نیا خریدا ہوا آئی فون ایک چالاکی سے کی گئی اسٹریٹ اسکیمنگ کے ذریعے چوری ہو گیا تھا۔

طوبیٰ انور کے مطابق وہ چھٹیاں گزارنے کے لیے لندن گئی تھیں۔ برطانیہ پہنچنے کے بعد انہوں نے ایک نیا آئی فون خریدا تھا جسے لے کر وہ خاصی پرجوش تھیں۔ ایک دن وہ اپنی ایک دوست کے ساتھ شہر کے ایک کیفے میں بیٹھی ہوئی تھیں کہ اسی دوران ایک اجنبی لڑکی ان کے قریب آ گئی۔

اداکارہ کے مطابق اس لڑکی نے کوکیز کی طرف اشارہ کیا جس سے انہیں لگا کہ شاید وہ کوکی مانگ رہی ہے۔ اسی لیے انہوں نے اسے کوکی دینے کی پیشکش بھی کی۔ تاہم اسی لمحے لڑکی نے بڑی مہارت سے ایک کاغذ ان کے موبائل فون پر رکھ دیا اور اپنے ساتھی کی مدد سے نہ صرف کوکی بلکہ ان کا آئی فون بھی چرا لیا۔

طوبیٰ انور نے بتایا کہ یہ چوری اس قدر صفائی سے کی گئی کہ انہیں فوری طور پر کچھ پتہ ہی نہیں چلا۔ بعد میں جب ان کی بہن وہاں پہنچیں اور انہوں نے فون کے بارے میں پوچھا تو اداکارہ نے اپنا موبائل تلاش کرنا شروع کیا لیکن وہ وہاں موجود نہیں تھا۔ اس واقعے نے انہیں شدید پریشان کر دیا۔

اداکارہ نے بتایا کہ اس واقعے کے بعد وہ چند دن تک ذہنی طور پر بہت دکھی رہیں اور گھر سے باہر بھی نہیں نکل سکیں۔ بعد میں ان کی بہن نے انہیں نیا آئی فون خرید کر دیا جس کے بعد وہ دوبارہ معمول کی زندگی کی طرف لوٹ آئیں۔