پاکستان ہانگ کانگ کے ڈیجیٹل تجارتی تصدیقی پلیٹ فارم ویلیڈیٹ میں شامل ہونے والا پہلا ملک بن گیا

پاکستان میں تجارت کے فروغ اور کسٹمز کے نظام کو جدید خطوط پر استوار کرنے کے لیے پاکستان سنگل ونڈو نے ہانگ کانگ کسٹمز کے بلاک چین پلیٹ فارم سے انضمام فعال کر دیا۔

پاکستان میں تجارت کے فروغ اور کسٹمز نظام کی جدید کاری کی جانب ایک بہت بڑا قدم اٹھاتے ہوئے پاکستان سنگل ونڈو نے ہانگ کانگ کسٹمز کے بلاک چین پلیٹ فارم ویلیڈ اے پی کے ساتھ اپنا انضمام مکمل طور پر فعال کر دیا ہے۔

ویلیڈ اے پی سے مراد دراصل ویلیڈیشن اینڈ آتھنٹیکیشن پلیٹ فارم ہے، جو ہانگ کانگ کسٹمز کا ایک جدید ڈیجیٹل دستاویز کی تصدیق کرنے والا پلیٹ فارم ہے۔

یہ بھی پڑھیں : پاکستانی معیشت میں رواں مالی سال نمایاں بہتری، کرنٹ اکاؤنٹ خسارے میں مزید کمی آگئی

اس نئے انضمام اور ڈیجیٹل ربط کے ذریعے اب پاکستان سنگل ونڈو سے جاری ہونے والی تمام الیکٹرانک تجارتی دستاویزات کی درست حیثیت کی فوری اور محفوظ ڈیجیٹل تصدیق بآسانی ممکن ہو سکے گی۔

اس جدید نظام کی سب سے اہم خوبی یہ ہے کہ تصدیق کے اس پورے عمل کے دوران کسی بھی اصل دستاویز یا حساس نوعیت کی معلومات کو ویلیڈ اے پی پلیٹ فارم پر منتقل یا محفوظ کرنے کی کوئی ضرورت پیش نہیں آئے گی۔

یاد رہے کہ 18 مئی 2026 کو پاکستان کسٹمز اور ہانگ کانگ کسٹمز کے درمیان ایک اہم مفاہمتی یادداشت پر دستخط ہوئے تھے، جس کے بعد اب پاکستان اس جدید پلیٹ فارم میں شامل ہونے والا دنیا کا پہلا ملک بن گیا ہے۔