توانائی تنصیبات پر ایرانی حملے، عالمی منڈی میں تیل مہنگا، ایشیائی منڈیاں مندی کا شکار

مشرق وسطیٰ میں توانائی تنصیبات پر حملوں کے بعد عالمی منڈی میں تیل کی قیمتوں میں نمایاں اضافہ اور ایشیائی اسٹاک مارکیٹوں میں کمی دیکھنے میں آئی ہے۔

ایران اور اسرائیل کے درمیان کشیدگی میں اضافے اور توانائی تنصیبات پر حملوں کے بعد عالمی منڈی میں خام تیل کی قیمتوں میں تیزی سے اضافہ ہوا ہے۔

برطانوی خام تیل کی قیمت سات فیصد اضافے کے بعد ایک سو گیارہ ڈالر فی بیرل تک پہنچ گئی، جبکہ امریکی خام تیل کی قیمت میں بھی اضافہ ریکارڈ کیا گیا۔

یہ بھی پڑھیں : گیس اور تیل تنصیبات پر ایرانی حملے اشتعال انگیزی ہے، متحدہ عرب امارات

اسی دوران ایشیائی اسٹاک مارکیٹوں میں نمایاں کمی دیکھنے میں آئی۔ جاپان کی مرکزی مارکیٹ میں تقریباً تین فیصد کمی ہوئی جبکہ جنوبی کوریا، ہانگ کانگ اور تائیوان کی منڈیوں میں بھی مندی کا رجحان رہا۔

ماہرین کے مطابق توانائی تنصیبات کو نشانہ بنانے سے عالمی توانائی کی فراہمی متاثر ہو سکتی ہے، جس کے نتیجے میں قیمتوں میں مزید اضافہ اور عالمی معیشت پر دباؤ بڑھ سکتا ہے۔

یہ صورتحال اس وقت پیدا ہوئی جب اسرائیل نے ایران کی گیس فیلڈ کو نشانہ بنایا اور اس کے جواب میں ایران نے قطر کی تیل اور گیس تنصیبات پر حملہ کیا، جس سے عالمی منڈیوں میں بے چینی بڑھ گئی۔