ہالی ووڈ کے معروف اداکار چک نورس انتقال کر گئے

ہالی ووڈ کے ایکشن ہیرو چک نورس 86 برس کی عمر میں انتقال کر گئے۔

 چک نورس کے اہل خانہ نے سوشل میڈیا کے ذریعے انکی وفات کی تصدیق کردی۔ خاندانی بیان میں کہا گیا کہ چک نورس نے اپنی زندگی، مقصد اور اپنے خاندان سے گہری محبت کے ساتھ گزاری۔ وہ نہ صرف ایک بڑے اداکار تھے بلکہ ایک بہترین شوہر، باپ اور دادا بھی تھے۔

چک نورس کا اصل نام کارلوس رے نورس تھا اور وہ 1940 میں امریکی ریاست اوکلاہوما میں پیدا ہوئے۔ جوانی میں انہوں نے امریکی فضائیہ میں خدمات انجام دیں۔ اسی دوران انہیں مارشل آرٹس سیکھنے کا موقع ملا۔

بعدازاں انہوں نے کراٹے، تائیکوانڈو اور دیگر فنون میں مہارت حاصل کی اور کئی بلیک بیلٹس اپنے نام کیے۔ انہوں نے اپنا ایک الگ مارشل آرٹ اسٹائل بھی متعارف کروایا جس نے انہیں دنیا بھر میں منفرد پہچان دی۔

انہوں نے 1960 کی دہائی میں کراٹے مقابلے جیت کر شہرت حاصل کی۔ اس کے بعد انہوں نے فلمی دنیا میں قدم رکھا۔ 1972 کی فلم "دی وے آف دی ڈریگن” میں ان کا کردار بہت مقبول ہوا جہاں انہوں نے بروس لی کے ساتھ کام کیا۔ اس فلم نے انہیں عالمی سطح پر پہچان دلائی۔

چک نورس نے اپنے کیریئر میں کئی مشہور فلموں میں کام کیا۔ ان کی ایکشن فلمیں ناظرین میں بے حد پسند کی گئیں۔ بعد میں انہیں سب سے زیادہ شہرت ٹی وی سیریز "واکر، ٹیکساس رینجر” سے ملی۔ یہ سیریز کئی سال تک نشر ہوتی رہی اور لوگوں نے ان کے کردار کو بہت سراہا۔

اداکاری کے علاوہ وہ فٹنس اور مارشل آرٹس کی تربیت کے فروغ میں بھی سرگرم رہے۔ انہوں نے نوجوانوں کے لیے کئی پروگرام شروع کیے۔ بعد میں انٹرنیٹ پر "چک نورس فیکٹس” کے نام سے بننے والے مزاحیہ میمز نے بھی انہیں نئی نسل میں مقبول بنا دیا۔

ٹیکساس کے گورنر گریگ ایبٹ نے ان کے انتقال پر گہرے دکھ کا اظہار کیا اور کہا کہ چک نورس ایک عظیم شخصیت تھے جنہوں نے حوصلے اور عزم کی مثال قائم کی۔ ان کی وفات سے فلمی اور کھیلوں کی دنیا میں ایک بڑا خلا پیدا ہو گیا ہے۔