اگر واٹس ایپ اکاؤنٹ ہیک ہوجائے تو صحیح کیسے کریں؟ پی ٹی اے نے مکمل طریقہ بتادیا

اگر کسی صارف کا واٹس ایپ اکاؤنٹ ہیک ہو جائے تو گھبرانے کی ضرورت نہیں، بلکہ فوری اور درست اقدامات کرنا ضروری ہے۔

 پاکستان ٹیلی کمیونیکیشن اتھارٹی (پی ٹی اے) نے اس حوالے سے اہم ہدایات جاری کی ہیں تاکہ صارفین اپنا اکاؤنٹ دوبارہ حاصل کر سکیں اور آئندہ کے لیے خود کو محفوظ رکھ سکیں۔

پی ٹی اے کے مطابق سب سے پہلے صارف کو اپنے موبائل سے واٹس ایپ ایپلیکیشن ڈیلیٹ کرنی چاہیے۔ اس کے بعد ایپ کو دوبارہ انسٹال کر کے اپنا موبائل نمبر رجسٹر کریں۔ رجسٹریشن کے دوران صارف کے نمبر پر ایک تصدیقی کوڈ موصول ہوگا، جس کی مدد سے اکاؤنٹ دوبارہ بحال کیا جا سکتا ہے۔

آپ کا واٹس ایپ ہیک ہو جائے تو گھبرانے کے بجائے درست اقدام اٹھائیں۔ چند آسان مراحل کے ذریعے اپنا واٹس ایپ اکاؤنٹ دوبارہ فعال کیا جا سکتا ہے۔
مزید آگاہی کے لئے ویڈیو ملاحظہ کریں، خود کو محفوظ رکھیں اور دوسروں کو بھی باخبر کریں۔#WhatsAppSafety #StaySafeOnline #CyberAwareness… pic.twitter.com/0vBmYm2nr7

— PTA (@PTAofficialpk) April 13, 2026

اتھارٹی نے بتایا کہ اکاؤنٹ کی حفاظت کے لیے ٹو اسٹیپ ویریفکیشن کو فعال کرنا بہت ضروری ہے۔ اس فیچر کی مدد سے کسی بھی غیر مجاز شخص کے لیے اکاؤنٹ تک رسائی حاصل کرنا مشکل ہو جاتا ہے۔

پی ٹی اے نے صارفین کو مشورہ دیا ہے کہ وہ کسی بھی مشکوک لنک یا فائل پر کلک کرنے سے گریز کریں۔ اس کے علاوہ موبائل فون اور ایپس کے پاس ورڈز کو باقاعدگی سے تبدیل کرتے رہیں۔ اگر کسی قسم کی غیر معمولی سرگرمی نظر آئے تو فوری طور پر واٹس ایپ سپورٹ سے رابطہ کریں۔

ماہرین کا کہنا ہے کہ ایک اینٹی وائرس اسکین چلانا بھی فائدہ مند ثابت ہو سکتا ہے، کیونکہ اس سے موبائل میں موجود کسی بھی نقصان دہ سافٹ ویئر کی نشاندہی ہو جاتی ہے۔ ان احتیاطی تدابیر پر عمل کر کے نہ صرف ہیک شدہ اکاؤنٹ واپس حاصل کیا جا سکتا ہے بلکہ ذاتی معلومات کو بھی محفوظ رکھا جا سکتا ہے۔

پی ٹی اے نے واضح کیا ہے کہ صارفین کو اپنی آن لائن سیکیورٹی پر خاص توجہ دینی چاہیے کیونکہ معمولی غفلت بھی بڑے نقصان کا باعث بن سکتی ہے۔