بجلی کے بھاری بلوں سے ستائے عوام کیلئے ایک اور بُری خبر آگئی

نیشنل الیکٹرک پاور ریگولیٹری اتھارٹی (نیپرا) نے ملک بھر میں بجلی صارفین کے لیے نرخوں میں اضافہ کر دیا ہے۔

اس فیصلے کے بعد فی یونٹ بجلی کی قیمت میں 1.42 روپے تک اضافہ ہو گیا ہے، جس کا اطلاق آئندہ بجلی کے بلوں میں کیا جائے گا۔

یہ اضافہ فروری 2026 کی ماہانہ ایڈجسٹمنٹ کی مد میں منظور کیا گیا ہے۔ اس کا باضابطہ اطلاق اپریل 2026 کے بلوں میں نظر آئے گا۔ اس فیصلے سے گھریلو اور کمرشل صارفین دونوں متاثر ہوں گے۔

نوٹیفکیشن میں واضح کیا گیا ہے کہ یہ اضافہ پورے ملک میں نافذ ہوگا۔ اس میں کراچی سمیت کے-الیکٹرک کے صارفین بھی شامل ہوں گے۔ تاہم کچھ صارفین کو اس سے استثنیٰ دیا گیا ہے۔

حکام کے مطابق لائف لائن صارفین اور الیکٹرک وہیکل چارجنگ اسٹیشنز پر یہ اضافہ لاگو نہیں ہوگا۔ ان شعبوں کو ریلیف برقرار رکھا گیا ہے تاکہ کم آمدنی والے طبقے پر اضافی بوجھ نہ پڑے۔

یہ اضافہ جنوری میں ہونے والے اضافے کے بعد سامنے آیا ہے، جس سے پہلے ہی بجلی کے بلوں میں اضافہ دیکھا جا رہا تھا۔ مسلسل ماہانہ ایڈجسٹمنٹس کے باعث صارفین پر مالی دباؤ بڑھتا جا رہا ہے۔