سندھ بھر میں ہیٹ ویو الرٹ جاری، کراچی میں گرمی کی شدت 42 ڈگری تک جانے کا خدشہ

محکمہ موسمیات نے کراچی سمیت سندھ بھر میں شدید گرمی اور ہیٹ ویو کا الرٹ جاری کر دیا ہے، جس کے تحت 11 مئی تک صوبے کے بیشتر اضلاع شدید تپش کی لپیٹ میں رہیں گے۔

محکمہ موسمیات نے صوبہ سندھ کے باسیوں کے لیے ایک سنگین ہیٹ ویو الرٹ جاری کیا ہے، جس کے مطابق آج سے 11 مئی تک صوبے کے بیشتر اضلاع شدید گرم موسم کی لپیٹ میں رہیں گے۔

خاص طور پر صوبائی دارالحکومت کراچی میں اس دوران موسم انتہائی گرم اور مرطوب رہنے کا امکان ہے، جس کی وجہ سے شہریوں میں ہیٹ اسٹروک یعنی لو لگنے کا خدشہ بڑھ گیا ہے۔

محکمہ موسمیات کے ماہرین کا کہنا ہے کہ اس دوران شہر کو ٹھنڈک پہنچانے والی سمندری ہوائیں متاثر ہوں گی، جس کے نتیجے میں گرمی کی شدت میں غیر معمولی اضافہ دیکھا جائے گا۔

پیش گوئی کے مطابق کراچی میں زیادہ سے زیادہ درجہ حرارت اڑتیس ڈگری سینٹی گریڈ تک جا سکتا ہے، تاہم ہوا میں نمی کا تناسب زیادہ ہونے کی وجہ سے گرمی کی اصل شدت یعنی محسوس کیا جانے والا درجہ حرارت چالیس سے بیالیس ڈگری سینٹی گریڈ تک پہنچ سکتا ہے۔

یہ بھی پڑھیں : کراچی والوں کے لیے راحت کی خبر، سمندری ہوائیں بحال ہونے کا امکان

فی الوقت شہر کا موجودہ درجہ حرارت اٹھائیس ڈگری سینٹی گریڈ ریکارڈ کیا گیا ہے، لیکن تپش کی وجہ سے یہ بتیس ڈگری محسوس ہو رہا ہے۔

ہوا میں نمی کا تناسب اٹھہتر فیصد تک پہنچ چکا ہے جبکہ مغربی سمت سے انیس کلومیٹر فی گھنٹہ کی رفتار سے ہوائیں چل رہی ہیں جو تپش کو کم کرنے میں ناکام ثابت ہو رہی ہیں۔

شدید گرمی کی اس لہر کے پیش نظر طبی ماہرین اور محکمہ موسمیات نے شہریوں، بالخصوص بچوں، بزرگوں اور خواتین کو خصوصی احتیاط برتنے کی ہدایت کی ہے۔

شہریوں سے اپیل کی گئی ہے کہ وہ دن کے اوقات میں، خاص طور پر دوپہر بارہ سے چار بجے تک، غیر ضروری طور پر گھروں سے باہر نکلنے اور سفر کرنے سے گریز کریں۔

گرمی سے بچنے کے لیے زیادہ سے زیادہ پانی کا استعمال، ہلکے رنگ کے سوتی کپڑے پہننے اور سر کو ڈھانپ کر رکھنے کی تاکید کی گئی ہے تاکہ ہیٹ اسٹروک جیسے جان لیوا خطرات سے بچا جا سکے۔