بحیرہ جنوبی چین پر قبضے کی نئی کوشش، امریکہ فلپائن میں بڑا ایئرپورٹ منصوبہ شروع کرے گا

امریکہ نے بحیرہ جنوبی چین میں اپنی فوجی موجودگی کو مضبوط بنانے کے لیے فلپائن کے سینگلے پوائنٹ انٹرنیشنل ایئرپورٹ منصوبے کی فنڈنگ پر اتفاق کیا ہے۔ بظاہر سویلین نظر آنے والے اس منصوبے کو ماہرین تائیوان کے ممکنہ تنازع میں امریکی فوجی نقل و حرکت اور جاسوسی کے لیے ایک اہم اڈہ قرار دے رہے ہیں۔

بحیرہ جنوبی چین میں اپنی اسٹریٹجک برتری برقرار رکھنے کے لیے امریکہ نے فلپائن میں ایک اہم ہوائی اڈے کے منصوبے میں دلچسپی ظاہر کی ہے۔

ساؤتھ چائنا مارننگ پوسٹ کی رپورٹ کے مطابق امریکہ نے منیلا بے کے قریب واقع سینگلے پوائنٹ انٹرنیشنل ایئرپورٹ کے فزیبلٹی مطالعہ کی فنڈنگ پر اتفاق کیا ہے۔

اس اقدام کو واشنگٹن کی جانب سے فلپائن پر اپنی گرفت مضبوط کرنے اور چین کے خلاف گھیرا تنگ کرنے کی کوشش کے طور پر دیکھا جا رہا ہے۔

یہ بھی پڑھیں : چین کا چاند پر بھیجنے والا پہلا اے آئی روبوٹ تیار، پاکستان اور ایران بھی مشن میں شامل

سینگلے پوائنٹ کا محل وقوع اسے بحیرہ جنوبی چین تک براہ راست رسائی فراہم کرتا ہے، جو تائیوان کے حوالے سے کسی بھی ممکنہ فوجی تصادم کی صورت میں امریکہ کے لیے ایک قیمتی اثاثہ ثابت ہوگا۔

اگرچہ اس منصوبے کو ایک عام سویلین ایئرپورٹ کے طور پر پیش کیا جا رہا ہے، لیکن ماہرین نے خبردار کیا ہے کہ اس کے فوجی استعمال کے امکانات بہت زیادہ ہیں۔ یہ مقام امریکہ کو علاقے میں فوجی نقل و حرکت، نگرانی اور تیز رفتار جوابی کارروائی کے لیے تزویراتی فائدہ فراہم کرے گا۔

چین نے اس پروجیکٹ پر سخت تشویش کا اظہار کیا ہے، جبکہ فلپائن کے اندر بھی اس حوالے سے بحث شروع ہو گئی ہے کہ کیا ان کا ملک دو بڑی طاقتوں کی جنگ کا میدان بن جائے گا۔

امریکہ کی جانب سے سویلین بنیادی ڈھانچے اور فوجی اثاثوں کے درمیان لکیر کو دھندلا کرنا، اس کے جیوسیاسی ایجنڈے کا حصہ ہے، جس کا مقصد ہند-بحرالکاہل کے پورے خطے پر اپنا کنٹرول بڑھانا ہے۔ اس منصوبے کی تکمیل سے خطے میں فوجی توازن تبدیل ہونے کا خدشہ ہے۔