ٹرمپ ایران کے خلاف مزید فوجی کارروائی پر سنجیدگی سے غور کر رہے ہیں، امریکی ماہر

امریکی معروف تھنک ٹینک کا کہنا ہے کہ صدر ٹرمپ ایران کے خلاف مزید فوجی کارروائیوں پر سنجیدگی سے غور کر رہے ہیں، کیونکہ جنگ اور ناکہ بندی دونوں ناکام ہو چکی ہیں۔

امریکہ کے معروف تھنک ٹینک کوئنسی انسٹی ٹیوٹ کے ایگزیکٹو نائب صدر تریتا پارسی نے الجزیرہ کو دیے گئے ایک انٹرویو میں کہا کہ امریکی صدر ڈونلڈ ٹرمپ اس وقت ایران کے خلاف اضافی یا مزید فوجی کارروائی کرنے پر بہت سنجیدگی سے غور کر رہے ہیں۔

انہوں نے کہا کہ امریکی انتظامیہ کی جانب سے بلند و بانگ دعوؤں اور بیانات کے باوجود یہ بات اب خود ان کے اقدامات سے واضح ہو رہی ہے کہ وہ اس حقیقت کو تسلیم کر چکے ہیں کہ نہ صرف پچھلی جنگ بری طرح ناکام رہی بلکہ ایران کی معاشی ناکہ بندی، جس کا مقصد ایرانیوں کے حوصلے توڑنا اور اس موجودہ جنگی منظر نامے سے بچنا تھا، وہ پالیسی بھی مکمل طور پر ناکام ثابت ہوئی ہے۔

یہ بھی پڑھیں : امریکی صدر دنیا کے سب سے بڑے جزیرے گرین لینڈ کو کیوں حاصل کرنا چاہتے ہیں؟

تریتا پارسی کا کہنا تھا کہ اب دونوں ہی فریقین یعنی امریکہ اور ایران اس بات پر پختہ یقین رکھتے ہیں کہ لڑائی کا ایک اور دور یا مزید کچھ جھڑپیں مستقبل میں ہونے والے سفارتی مذاکرات کے دوران ان کی پوزیشن کو مضبوط کر سکتی ہیں اور انہیں زیادہ فائدہ پہنچا سکتی ہیں۔

انہوں نے مزید کہا کہ خاص طور پر ایرانی حکومت کے اندر وہ عناصر جو شروع سے ہی یہ دلیل دے رہے تھے کہ طاقت کا جواب طاقت سے دیا جائے، وہ اب موجودہ جنگ کی صورتحال اور اس کے طریقہ کار کو دیکھ کر یہ سمجھ رہے ہیں کہ ان کا مؤقف بالکل درست تھا اور اب وہ مزید پیچھے ہٹنے کو تیار نہیں ہیں۔